Emirates Stadium-ah Arsenal leh Manchester United te chuan FA Cup Third Round match an khel a, team hnih te hun pangngaiah 1-1 in an inhnehtawk a, extra time-ah pawh goal a lut lo. Penalty shootout-ah United chuan 5-3 in hnehna an chang.
Manchester United hi second half minute 61 atangin kim loin an khel tan. Dalot hnawhchhuah a ni a, extra time nen minute 60 chuang United hi kim loin an khel, heti chung hian a tam zawk Arsenal chu an dang char char a, penalty shootout an thlenpui ta a ni.
Goal hmasa ber hi minute 52-a lut a ni a, Garnacho ball pek chu Bruno Fernandes chuan mawi lutukin top corner-ah a chhuih lut. Diogo Dalot a mawl thut, yellow card chawi tawh ni chungin a fimkhur lo hle a, Merino a tlawh avangin referee Andy Madley chuan yellow card vawi hnihna a phawrh a, minute 61-ah a hnawtchhuak.
Dalot a chhuah hnu minute 2 lekah Arsenal chuan an siphurh an rul a, Gabriel chuan hniam der dawrah a volley a, United goal near post lamah a lut. Arsenal-in Havertz hmangin penalty an hlawhchhuak, Box chhungah Maguire chuan a banin Havertz a dang, ani lah a thal tawp. Referee chuan penalty a ham a, VAR a awm bawk si lo, ennawn ni selang chuan penalty ham a ni hauh lo ang le.
Penalty pet turin Martin Odegaard a rawn pen chhuak, Norway international penalty pet hi Bayindir chuan a lo dan sak hlauh mai.Hun pangngai a zo a, goal dang a lut tawh lo. Extra time khelh a ni leh a, minute 30 chhungin goal a lut tawh lo bawk.
Penalty shootout-ah hian Manchester United atanga pet zawng zawngin an pet goal vek a, Kai Havertz-a pet chu Bayindir chuan a lo dang, 5-3 in penalty shootout-ah Manchester United an chak a, FA Cup Fourth Round-ah Leicester City an hmachhawn ang.
Emirates Stadium-ah hian first half match a hmuhnawm lem lo. Second half erawh a hmuhnawm phian. Arsenal lamin inkhel an thunun a, Dalot hnawhchhuah a nih hnu phei chuan United goal hnaihah an inkhel a ni deuh ber.
Kai Havertz chuan clear chance tha lutuk vawi hnih a hlah, a hlah te kha a mak zawk hial a ni. Bayindir a chetha a, Declan Rice-a head tha lutuk a lo dan sak a, inkhelh chhung zawngin vawi 6 tha tak takin a save. Extra time second half-ah Zirkzee chuan goal khungna chance tha lutuk a nei, mahse Raya chuan a lo dan sak.
Minute 60 chuang kim loin United an khel a, a beh pawh an bet. Mahse an defender te an che tha em em, De Ligt chuan Trossard-a pet goal tur tha lutuk a lo dan te kha ropui tak a ni. de Ligt, Maguire leh Martinez te an inkawp fuh em em a, Arsenal hmatawng ten an paltlang thei lo.
Inkhel en chuan chak phu zawk chu Arsenal an ni a, mahse a tawp thlenga theihtawp chhuah United player te an fakawm a, chak zo lo mah se United supporter te khan an player te kha an dem hauh lo ang, mahse hnehna an chang thei kha a ropui hle a ni.