FA Cup semi final hmasa zawk inkhelah Manchester City leh Liverpool te chu Wembley Stadium-ah an inhmachhawn a, Liverpool hian 3-2 in hnehna an chang a, final an lut.

Liverpool tan hian Sadio Mane chuan goal hnih a khung bakah Ibrahima Konate chuan goal khat a khung bawk a, Manchester City tan hian Jack Grealish leh Bernardo Silva te chuan goal an khung ve bawk a ni.

Kum 2012 hnuah a vawi khat nan Liverpool hi FA Cup final khel turin an inpet tling a, final-ah hian Chelsea emaw Crystal Palace emaw an hmachhawn ang.

Liverpool hian an first team pangngai an luh tir laiin City erawhin team nem deuh zawk an khelh tir a, Ederson, Kevin de Bruyne leh Rodri-te bench-ah an awm vek.

Minute sawm an khelh tlin hma lawkin goal hmasa ber a lut a, corner atanga ball vawrh luh chu Konate chuan goal-ah lo tauh lutin, Liverpool hma a hruaipui a, Konate hian a zawnin game thumah goal a thun tawh.

Minute sawm dang pawh a ral leh hmain Liverpool-in goal an khung belh nghal a, City goalkeeper Zack Steffen-a confi sual vang liau liau a ni. Steffen hian ball pet chhuak mai lovin khalh a tum niin a lang a, Mane chuan rawn nangchingin Senegalese forward hian goal-ah ball a tlawh lut a, 2-0 a ni.

Half time hma lawkin 3-0 in Liverpool hian hma an hruai zui a, Liverpool lam hi City box hmawrah nalh taka an inpek kual hnuah Thiago ball flick nalh zet hmang tangkaiin Mane chuan goal a khung a, si thum faiin Liverpool hian half time-ah hma an hruai.

Second half an tan chiaha, City in goal an khung nghal a, Premier League player man to ber Grealish chuan City goal hmasa zawk a khung. 3-1 a nih reng hnuah injury time-ah City-in goal dang an khung a, Riyad Mahrez-a cross chu Bernardo Silva chuan goal ah thunin, 3-2 in Liverpool an chak ta a ni.

Manchester City 2-3 Liverpool

(Grealish 47’, Bernardo 90+1’) (Konate 9’, Mane 17’, 45’)

Player Ratings