Inrinni zan FA Cup Quarter Final inkhelah Manchester City chuan, an captain hlui Vincent Kompany-a team enkawl lai Burnley an mikhuala, 6-0 in City hian an mikhual te hi an sawpa, semi-final khel turin an inpet tling.
Kar liamta a RB Leipzig laka goal 5 khungtu Erling Haaland a che tha leh pek viau a, Norwegian striker hian Burnley lakah hian hattrick a siam. Haaland bakah hian Julian Alvares chuan City tan goal hnih a khunga, Cole Palmer chuan goal khat a khung bawk.
Darkar chanve chuang hret an khelhin City hian an goal hmasa ber an thuna, Alvarez-a’n Haaland through ball a pe a, Burnley goalkeeper rawn tlan chhuak mah se, Haaland hian goal ah a pet lut.
Minute thum hnuah Haaland hian goal a khung leh nghala, Phil Foden chuan mual veilam atangin ball a khalh luh hnuah, Haaland-a tan a cross a, Haaland hian nalh takin a lo finish a, 2-0 in City in hma an hruai.
2-0 in first half a tawp a, darkar khat an tlin vel chiah tihin Haaland chuan hattrick a siam. 59mins-ah Riyad Mahrez chuan box chhung veilama awm Foden ball a pe a, Foden hian goal-ah shoot mah se, si ban a pet per. Si ban pera ball rawn let hi Haaland chuan goal-ah lo khungin, a goal thumna leh City goal thumna ni bawk a thun.
Haaland-a’n hattrick a siam atanga minute thum hnuah City in goal an thun leha, Mahrez chuan Burnley box-a inpawt lut Kevin de Bruyne ball pe in, De Bruyne hian box chhung dinglam atanga Alvarez a pe. Argentine striker hian hnai set sawt atangin goal-ah a lo chan tir a, si li faiin City in hma an hruai.
68mins-ah goal dang a lut leha, Foden chuan box chhung dinglam atangin ball a cross a, hei hi Burnley si ban nghaktu Peacock-Farrell chuan lo nam chhuak mah se, ball a kal hla lova, Palmer chuan goal-ah pet lut chhunzawmin, nuamsa takin City in hma an hruai chhunzawm.
City hian si nga faiin hma hruai tawh mah se, an la duhtawk lova, minute 70 chuang hret an khelhin goal an khung belh leh. De Bruyne chuan Alvarez chu through ball tha zet a pe a, Alvarez hian Burnley box-ah ball khalh lutin, Burnley defender a bum hnuah, goal-ah ball a pet lut a, 6-0 in inkhel a tawp ta a ni.