Sunday zan khan 2021 Formula 1-a race hmasa ber Bahrain Grand Prix tlan zawh fel a ni a, champion lai Lewis Hamilton bawk a chungnung bera, practice-na lamah che tha ber Red Bull driver Max Verstappen chu pahnihna a ni.
Tun season-a race hmasa ber a hmuhnawm nghal hle a, boruak a awm nghat phat bawk. Verstappen hian lap li la awmah Hamilton a lehpela, mahse thuneitu lam atanga thupek an dawn avangin Vestappen hian Hamilton a inlehpelh tira, Hamilton hi a chak zui bawk.
Lap li la awma Verstappen-a’n Hamilton a lehpelh hian, off-track a tlanin, track limit dan a bawhchhia a, hemi avang hian thuneitu lam chuan Red Bull team hi Hamilton inlehpelh tir leh turin thu an pe a, Verstappen hian hreh tak chung siin, loh theih lohna avangin Hamilton hi a inlehpelh tir.
Hamilton hian kum 2015 hnuah a vawi khat nan season-a race hmasa ber ah hnehna a changa, a title pariatna (record thar tur) lak a tumna kawngah hnehna bul a tan nghal.
Grand Prix-a vawi 95 chak tawh Hamilton chuan race zawhah, “Hun eng emaw chen atanga ka race hmachhawn hautak ber a ni a, pracetice-naah an che tha em em a, chuvang chuan chak tur chuan eng emaw tak a ngai dawn tih a chiang sa a ni,” a ti.
Red Bull driver Verstappen hi Bahrain GP practice-ah a che tha hle a, practice vawi tum tlanah a chungnung ber vekaa, pole position-ah a tan nghe nghe a ni.
Hamilton- team-mate Valterri Bottas chu Bahrain GP-ah hian pathumna a ni a, McLaren lam mi Lando Norris chu palina niin, panganaah Vertsappen-a team-mate Sergio Perez a awm ve thung.
Kum hnih hnua F1-a rawn kir Alpine F1 driver Fernando Alonso a vanduaia, a car brake ducts a chhiat avangin a brake lam a fail a, Bahrain GP-ah a tlan zo thei lo.
Aston Martin driver Sebastian Vettel chu Esteban Ocon a sut avangin 10seconds penalty pek a ni a, Michael Schumacher-a fapa, Haas driver Mick Schumacher chu Vettel-a hnung chiah 16-naah a awm bawk a ni.
Bahrain GP result (top 10):
1) Lewis Hamilton, Mercedes
2) Max Verstappen, Red Bull
3) Valtteri Bottas, Mercedes
4) Lando Norris, McLaren
5) Sergio Perez, Red Bull
6) Charles Leclerc, Ferrari
7) Daniel Ricciardo, McLaren
8) Carlos Sainz, Ferrari
9) Yuki Tsunoda, AlphaTauri
10) Lance Stroll, Aston Martin