Aston Martin chuan nakkumah tuna an driver kawl mek pahnih Sebastian Vettel leh Lance Stroll te chu an kawl chhunzawm zel dawn.

Kum 34 mi Vettel hian a contract-ah kum khat dang Aston Martin-a cham theihna neiin, chu chu a hmang tangkaia, season tharah pawh Aston Martin driver a ni chhunzawm dawn dawn ta a ni.

Season thar atang hian F1 chuan dan thar an kalpui dawn a, aerodynamics kalhmang leh thil dang dang pawh an siamtha nual dawn a, heng hi inlehpelh awlsam nan leh thil dang atana tih a ni.

F1 world champion vawi li ni tawh Vettel chuan, “Season tharah team tinte'n bul kan tan thar dawn a, kan tan pawh chance tha tak a ni dawn. Formula 1 car generation thar hi a danglam dawn hle a, midang pawh a hma aiin kan hnaih theih ngei a beiseiawm.

“Race hi a hma aiin a hmuhnawm ngei dawn a, chu chu driver-te tan leh fan-te tan pawh thu lawmawm tak a ni. Kan team thang mek zel hi ka ringtawk a, kum 2022 hi ka nghakhlel tawh hle a ni,” a ti.

June thla khan Azerbaijan Grand Prix-ah Vettel hi pahnihna niin, hei hi Aston Martin a zawm hnua podium a chan vawi khatna a ni.