Formula 1 thuneitu FIA chu an in singsa mek a, an insingsakna kal mekah F1 race director ni lai Michael Masi chu ban a ni.

Season hmasa khan race tawp ber Abu Dhabi Grand Prix-ah thil sawisel theih tak leh hriat thiam har tak a thleng a, hemi thil kal zel avang hian FIA hi an insingsa a, Masi pawh hi ban a ni ta a ni.

Season hmasa race tawp berah khan Masi hi thutlukna siam tu ber a ni a, safety car hman dan chungchang leh a hnu zela an kal dan tur a rel danah dan awm sa a zawm tawk lova, hemi hi an ban chhan pawh ni ngeiin a lang.

F1 race director hi pahnih an awm tawh dawn a, nihna an inchelh chhawk zak zak dawn niin a lang a, official te tanpuitu tur pawh dah belh a ni bawk dawn.

F1 race director thar tur pahnih hi Eduardo Freitas leh Niels Wittich te an ni a, anni pahnih hi F1 veteran Herbie Blash chuan a thlawp dawn a ni.

Freitas hi World Edurance Championship race director hlui a ni a, Wittich hi hi DTM German Touring Car Championship-ah race director angin a lo awm ve tawh bawk.

F1 race director an ban tak Masi hian 2019 F1 season tan dawna  thi ta Charlie Whiting thlakin F1 race director hna hi a chelh tan a, FIA president Mohammed ben Sulayem chuan Masi hi hna dang an zawrh dawn tih a sawi a ni.