Pierre-Emerick Aubameyang chuan free transfer-in Marseille a zawm leh a, Saudi atangin Europe-ah a kir leh ta a ni.

Arsenal leh Chelsea forward hlui hi a khelhna Saudi Pro League club Al Qadsiah chuan a contract an tihtawp sak a, free agent-in a club hlui Marseille a zawm leh ta a ni.

2023-24 season khan Marseille tan a lo khel tawh a, khatah khan game 51 atangin goal 30 a khung.

July 2024 khan top division-a kai thar Al Qadsiah chu Aubameyang hian a zawm a, Saudi club tan season liamta khan game 36 a khel a, goal 21 a khung.

Kum 36 mi hian kum 2008 khan AC Milan-ah bul a tan a, Dijon, Lille leh Monaco-ah te loan-in a khel kual a, kum 2011 khan Saint-Etienne a zawm. French club-ah thla 18 huhn a hmang a, game 97 atangin goal 41 a khung a, kum 2013 July thla khan Borussia Dortmund a zawm.

German club tan season 5 a khel a, goal 98 a khung a, kum 2018 khan Arsenal chuan £56million-in an lei.

Gabonese forward hian kum 4 leh a chanve North London club tan hun a hmang a, 2018-19 season khan Premier League goal 22 a khung a, a season dawt lehah pawh heti zat tho a khung leh. 

Mikel Arteta chuan a captain nihna a hlih sak a, kum 2022 February thla kha inhriatthiam tawnna hmangin an inchhuahtir ta nge nge a, Barcelona leh Chelsea tan a khel a, kum 2023 khan Marseille a zawm a ni.