Neymar chuan kum 12 hnuah a chawr chhuahna club Santos-a kir leh a tum a, inremna engkim an nei tawh. Hemi hnu hian Europe lama kir leh a tum nia report a ni.
January ni 27 khan Al Hilal leh Neymar te chuan contract tihtawp chungchangah inremna an nei. Hemi hnu hian a club hlui Santos-ah thla 6 chhung atan khelh leh a tum a, Santos leh Neymar te hian inremna an nei tawh a, kar leh lamah fans hmaa phochhuah a ni dawn a ni.
Brazil international kum 32 mi hian Europe-a khelh leh a la tum reng niin The Athletic chuan a tarlang a, kum 2023 khan PSG chhuahsanin Saudi Pro League lam a pan a, Europe top 5 league-ah a inlan leh tawh lo.
Neymar hi Santos academy chhuak a ni a, Brazil club tan hian game 225 a khel a, kum 2009 atanga kum 2013 chhung khan goal 136 khungin, hemi hnu hian Barcelona a pan ta a ni.
Barcelona-ah Messi leh Suarez te ho nen trio hmuhnawm tak an lantir. Goal pawh an khung hnem, trophy pawh an chawi hnem. Mahse PSG a pan tak hnuah erawh European competition lamah no mawi a chawi ta lo a ni.
Neymar hian Messi leh Suarez te kianga khelh ve leh a chak thu a lo sawi tawh a, Inter Miami a zawm maithei niin thu a thang hat hman.
"Zep thu a cheng lo, Messi leh Suarez te nena khelh ho leh chu a nuamin a ropui dangdai leh khawp ang le.
"Ka thiante an ni a, kan la inbe pawp reng. Kan trio kha thar thawh leh chu a chakawm teh e. Football-ah hi chuan mi barakhaih deuh deuh a thleng fo a nia," tiin Neymar chuan CNN a hrilh a nih kha.
Tun dinhmunah erawh Inter Miami lamin Neymar hi lak an zuam chiah lo. Inter Miami head coach Javier Mascherano a rawn tawngchhuak ve nghal vat a, Neymar chu an lak phak a nih loh thu leh, MLS salary cap avanga an lak theih loh tur thu a sawi.
"Neymar chungchang hi chu kan ngaihtuah thei lo, a chhan chu pawisa kan nei lo a ni.
"A nihna takah chuan, Neymar hi chu player ropui a ni alawm. Coach tu pawhin an hnuaia khel atan an duh vek ang.
"Mahse MLS danin min phuar a, salary cap avangin tun dinhmunah chuan keini tan lak theih a ni lo a ni," tiin kum 40 mi Mascherano chuan Reuters a hrilh.