Season liamta Premier League-ah khan 15-na an ni a, Europa League final-ah Tottenham an hneh lo bawk. Tun season-ah Manchester United chu European Competition-ah an inlan dawn lo.
Europe-a an inlan lo tur chu Amorim chuan team tan a ṭhat phah zawk a rin thu a sawi a, training-na hun ṭha an neih tam dawn thu a sawi.
Nilaini zan hian Carabap Cup-ah United chuan League Two club Grimsby an hmachhawn dawn, tun kar chhungin match 3 an nei dawn. Demestic Cup hi team rotate nan hman a tum thu Amorim chuan a sawi bawk a ni.
"Tun kar hian game 3 kan nei, player theihna sang tak tak kan kawl ṭeuh a, hengah te hian kan insiksawi kual thei dawn a, game tinah chak kan tum dawn a ni.
"Club dang chu European competition atan an inbuatsaih dawn a, keini erawh chu Europe-ah kan inlan dawn lo a, kan rilruah pawh a awm lo, hei hi kan ṭhatpui thei zawk dawn niin ka hria.
"Champions League leh Premier League-a team khawng tak nei tur chuan, hun kan la mamawh deuh dawn.
"Game tin ṭha taka khel turin inbuatsaihna hun kan nei a, Premier League game hi a hautak em em. Chuvang chuan a bulṭhut aṭanga team kan rem chhoh a ngai. Kan hma hun atan tunah hian kan inbuatsaih a, hma kan sawn zel dawn a ni," tiin United boss Ruben Amorim chuan a sawi.
Amorim chuan Carabao Cup-ah hian Kobbie Mainoo, Harry Maguire, Manuel Ugarte leh Joshua Zirkzee te chu a chhawr rin a ni a, tun season Premier League-a la inlan lo goalkeeper Andre Onana pawh a inlan rin a ni bawk.
Noussair Mazraoui erawh squad-ah a la kir leh thei lo a, "Noussair a lo kir ṭep, a hranin amah hi kan enkawl a, training chu a nei tawh, mahse a inhliam belh loh nan dimdawi deuhin kan enkawl a ni," tiin Amorim chuan Mazraoui chungchang a sawi.
Rasmus Hojlund erawh United squad-ah a tel a beiseiawm loh, ani hi United chuan thehchhuah an tum mek a, bazarah an zuar mek. Italian club Napoli chuan Hojlund hi an ngaihven a, an inlak theih pawh a rinawm.
Tin, bomb squad an tih mai Antony, Jadon Sancho, Alejandro Garnacho leh Tyrell Malacia te pawh Amorim hian chhawr a tum rih lo a, transfer bazar inkhar hma ngeia thehchhuah an tum mek a ni.