Europa League hmawr bawk a ni a, final-ah Spanish club Sevilla leh Italian club Inter Milan te inhmachhawnin, Sevilla hian 3-2 in hnehna an changa, a vawi ruk nan Europa League-ah an champion.
Sevilla hi Europa League-a champion ngun ber an ni a, final vawi ruk lut tawhin, final-ah an la tlawm ngai lo tluang zela, Inter erawh kum 1997 hnuah a vawi khat nan UEFA competition final-ah an tlawm.
Inkhel hmuhnawm tak a ni a, Sevilla tan hian Luuk de Jong chuan goal hnih a khung bakah Diego Carlos chuan goal a khung bawka, Inter Milan tan hian Romelu Lukaku leh Diego Godin te chuan goal an khung bawk.
Sawi tawh angin inkhel hmuhnawm tak a ni a, team hnih an inhlau lo tawnin, an innawr na dun viaua, first half-ah goal li ngawt a lut. A tawpah erawh final-a chak lo ngai lo Sevilla an chungnunga, season tharah Champions League an khelh phah dawn bawk a ni.
Inkhel an tana, minute nga vel awrh khelh a nihin Inter Milan lamin penalty an hlawhchhuak nghal; Lukaku chuan Sevilla box chhungah ball a khalh luta, Lukaku chak zia leh hnawk ziak kan hmu leha, box chhung vel chiahah a mah chuhtu Diego Carlos chuan Lukaku hi rapin, Lukaku a tlu a, referee-in penalty spot a kawh bakah Carlos hi yellow card a pe bawk. Penalty spot atang hian Lukaku chuan pet goal-in 1-0 in Inter in hma an hruaia, Lukaku hian tun season-a Europa League game a khelh zawng zawngah goal a khung kim veka, Inter tan tun season-ah goal 34 lai a khung bawk.
Inter hian hma an hruai rei lova, goal an khung hnu lawkah goal an chhuah ve leh nghal; mual dinglam atanga Jesus Navas-a ball cross chu De Jong chuan mawi takin goal-ah a lo tauh luta, 1-1 a ni. Inter manager Antonio Conte a tang hle a, referee nen pawh inchhang buai deuhin, goal an chhuah hnu lawkah yellow card pek a ni.
Darkar chanve chuang hret khelh a nihin Sevilla-in hma an hruaia, freekick atanga Ever Banega-a ball vawrh luh chu De Jong bawk chuan a lo tauh lut leha, 2-1 in Sevilla in hma an hruai. Sevilla hian hma an hruai rei bik lova, Inter striker Lukaku chuan freekick a hlawhchhuak zuia, freekick atang hian Marcelo Brozovic chuan Sevilla box chhungah ball a vawrh luta, Godin chuan hnai thawkhat tak atangin chiang takin a lo tauh lut ve leha, 2-2 a ni.
Darkar khat chuang hret khelh a nihin Lukaku chuan chance tha tak a nei a, centre line-ah ball pek niin, Sevilla defence hnungah a put ru a, goal lamah ball chak takin a khalh pheia, shoot mahse Sevilla goalkeeper chuan a lo save. 70mins chuang hret khelh a nihin Sevilla hian mual dinglam freekick an hlawhchhuaka, freekick atang hian Inter box-ah ball vawrh luh a ni; Inter defender lamin ball lo tauh mahse an tauh chhuak zo lova, Carlos chuan ball kang lo back volley-in Lukaku chuan a lo khawih pera goal-ah lut zuiin Sevilla chuan hma an hruai leh. Goal luh danah hian Lukaku chu a own goal ngeia a lan laiin, Carlos-a goal anga kalpui a ni.
Inter hian goal khung an tum hle a, mahse Europa League finala-a chak lo thiam lo Sevilla tawp thlengin an khawng. Inter hian chance insiam in, Alexis Sanchez pawhin hun tawp dawn lamah chance tha tak nei mahse goal a luh belh tawh lova, Sevilla hi chakin, an champion leh ta a ni.
Sevilla 3-2 Inter Milan
(De Jong 12’, 33’, Carlos 74’) (Lukaku 5’pen, Godin 35’)
Player Ratings
Sevilla - Bono 8, Navas 9, Kounde 8, Carlos 7, Reguilon 7, Fernando 6, Jordan 6, Banega 8, Ocampos 6, Suso 7, De Jong 8. Subs - Munir 5, Gudelj 5, Vazquez 5, En-Nesyri 4.
Inter - Handanovic 5, Godin 6, De Vrij 6, Bastoni 5, D'Ambrosio 6, Barella 7, Brozovic 6, Gagliardini 5, Young 5, Lukaku 6, Martinez 4. Subs - Candreva 5, Moses 5, Sanchez 6, Eriksen 4.