Euro 2024 England squad-ah khan Manchester City midfielder Jack Grealish chu telh ve a ni lo a, England team-a hnawl a nih avang khan Grealish chuan a rilru a nat em em thu a sawi bakah, a hun tawna hrehawm a la tih ber a nih thu a sawi bawk.

City midfielder hi Euro preliminary squad-ah telh a ni a, friendly match-ah Bosnia and Herzegovina a hmachhawn ve hman. Mahse final squad-ah erawh chhawk a ni ta a nih kha.

Grealish chuan a hma aia tha zawka lo kir leh a tum thu a sawi a, a thil tawn chu theihnghilh har a tih thu a sawi bawk.

"Football-a ka thil tawnah chuan hrehawm ka la tih ber tum a ni ang. Ka rilru a na em em a, holiday ka nei a, chungah hun ka hman lai pawh chuan phone ka en a, tv ka en a, engkim mai hian ka rilru natna tur a thlen a ni ber," tiin Grealish chuan a sawi.

Kum 2021 khan Grealish chuan Man City a zawm a, a season khatnaah chetha em em lo mah se 2022-23 season-a an treble tum kha chuan tha a thawh hlawk hle. Season liamta erawh beisei angin a che tha lo deuh.

"Tun season-a ka thil tawn khan nasa takin min fuih thar a, hmasawn zel duhna thinlung min pe a, kum hnih liamta ang maia thaa lo kir leh ka tum dawn a ni.

"Ka season khatnaah City-ah khan ka khel tha em em lo, season hnihnaah erawh inkhelhna hmun ka chang hnem. A hma aia tha zawka lo kir leh ka tum dawn a ni," tiin Grealish chuan a sawi bawk.