Vawiin thawhlehni hian Manchester United hotute chu khunkhan takin an meeting a, an first team performance an thlir let. Erik ten Hag-a chungchang pawh an rel dawn niin The Athletic chuan a tarlang.

Season hnih Ten Hag hian United a enkawl tawh a, trophy pahnih chawipui mah se, fak erawh a hlawh ngai chuang lo a, a game khelhpui danah fans tam tak an lungawi lo.

Kan hre vek a, tun season-ah pawh 14-na an ni mek a, United supporter tam tak chuan hun pek zel an duh tawh lo. United hotute hian hun pek zel an la tum dawn nge? An ban mai tawh dawn? Zaninah chuan an thutlukna a hriat theih turah ngai ang.

Tun season Premier League-ah game 7 chiah an la khel a, coach thlak an duh a nih chuan thlak hunlai tak chu a ni ve reng. Season chanveah erawh coach tha an hmuh a rinawm tawh loh.

Media thenkhat chuan nakkum nipuiah Xavi Alonso an dawr dawn niin an tarlang. Mahse Spanish coach hian Real Madrid enkawl a chak zawk ngei dawn a, Alonso hi chu an lak theih a rinawm chiah loh.

Media te chuan Thomas Tuchel nen an sawizawm leh a, mahse German coach hian nipui lai khan United a lo hnar tawh a nih kha. Tuna United coach nih leh a duh thut a rinawm loh bawk.

Thenkhat chuan Nistelrooy-a'n United a enkawl chho dawn ni tein an sawi bawk a. Engpawh nise, tun dinhmunah chuan coach duhthusam an zawn hmuh a rinawm loh.

Coach tha hna nei lo an awm mang bawk si lo a, United hotute hian Ten Hag hi tun season chu an la chhawr chhunzawm zel a rinawm deuh. Chutih laiin an inban thut thei bawk. Zanin emaw naktuk zingah emaw thu chiang kan hre turah ngai ang.