Juventus chuan Paris Saint-Germain forward Randal Kolo Muani chu tun season chawhnu chhung atan loan-in an hawh a, PSG hian eng tin nge heti zat zat loan-a an chhuahtir theih?

PSG hian loan-in player 6 lai an chhuahtir tawh, hei bak hi loan-in an chhuahtir thei tawh lo. Chutih laiin Muani chuan kar hmasa khan Turin a thleng si.

PSG hian loan-a Villarreal hnena an chhuahtir mek Juan Bernat-a contract chu an tihtawp sak ta niin French chanchinbu te chuan an tarlang a, hei vang chauh hian Muani chuan Juventus a zawm theih phah ta a ni.

Tottenham leh Manchester United te pawhin an ngaihven French forward Muani loan manah hian Juventus chuan €1million ($1.04m) an pe phawt a, a chetthat chuan  €2m  an la pek belh thei dawn niin The Athletic chuan a tarlang. Hetih lai hian loan zawha in lei theihna erawh an inremnaah hian a tel lo thung.

Kolo Muani hian kum 2023 nipui lai khan PSG a zawm a, kum 5 chhung atan Paris club-ah contract a ziak. PSG tan hian competition hrang hrangah game 54 a khel tawh a, goal 11 khung tawhin, assist vawi 7 a nei tawh bawk.

Tun season chhungin kum 26 mi hian Ligue 1-ah goal 2 a khung ve tawh a, vawi 10 inlan tawhin, heng a inlan chhun te pawh hi bench atanga a luh te a ni hlawm.

Muani hian French club Nantes atangin bul a tan a, kum 2022 khan free transfer-in Frankfurt a zawm a, hetah hian league game 34 atangin goal 16 lai a khung.

Ram tan vawi 27 a inlan tawh a, World Cup 2022 leh Euro 2024-ah te khan Didier Deschamps-a team-ah a tel ve a ni.

Muani zawm thar Juventus hian tun season Serie A-ah chak loh an la nei lo. Hetih lai hian vawi 13 lai an khingpui an inhnehtawkpui a, table-ah 5-na an ni mek.