Engtin nge MPL-ah match fixing a awm theih?

04th November 2024, 04:11PM

Mizoram Premier League season liamtaah khan match fixing a awm ngei niin Mizoram Football Association chuan a hria a, ngawrh takin a chhui a, official-a thuchhuah an rawn nei dawn. Hrem ngai player leh club te an awm chuan, kimchang takin a rawn puang turah ngai ang.

Page comment-na lamah a kalphung hrethiam lo kan tam hle a, "MPL-ah sum a tlem si a, pawisa inthapna atan a tlak dawn em ni?" ti te pawh kan awm nawk mai. He thil hi a ril khawp mai, sum pawh a tam a, MFA lamin kimchangin an la rawn puang ang a, chumi hmain kan hriatthiam theih dan turin awlsam deuh hlekin sawifiah tum teh ang.

PAWISA INTHAPNA ATAN MPL AN HMAN CHHAN

State kilkhawr ber pawh nise, sports league mumal tak, result ṭha taka tarlan theihna a awm chuan, chu chu pawisa inthapna tlak leh ṭha a ni ṭhin. 

English Premier League te, Indian Premier League leh Indian Super League te chu expert an tam a, pawisa thap pawh an tam bawk. Chak tur hi a hriat lawk deuh titih theih ti ila kan sawi sual lo ang. Chuvang chuan pawisa thaptute tan a hlawk nep deuh chang a tam.

Chutih laiin, Mizoram Premier League erawh, result bak an rawn hre tak tak lo a, game bihchiang turin uluk taka inkhel en ṭhin state pawnah an tam lo. Chuvang chuan pawisa thapna atan league ṭha tak a ni thlawt a ni mai.

ENGTIN NGE MATCH FIXING A AWM THEIH?

Entirna hriatthiam awlsam tak hetiang hian siam ang aw. Nagaland-ah hian football league mumal tak awm se, chutah chuan pawisa thap ta ila.

League-ah chuan club 8 awm se, club 4 emaw player te hnenah emaw pawisa eng emaw zat pe ta ila. Ka club thamte chu Sakei FC, Sazuk FC, Savawm FC leh Zawng FC te an ni a, an club hotute hnenah nuai 5 ṭheuh ka pe.

Tin, player eng emaw zat hnenah sing hnih khat ṭheuh pe bawk ila, chutianga ka tham theih chuan, Nagaland league-ah khan kan duh dan ang thlapin result ka siam thei dawn tihna a ni.

India ramah hian pawisa thapna hi a turu lutuk, Nagaland league-a betting an buatsaihah pawh chuan tel an tam a, kei chuan thamnan sum nuai 30 emaw vel player leh club hotute hnenah thehchhuak mah ila, ka pawisa thapna aṭangin nuai 50 chuang ka la lut thei daih dawn tihna a ni.

Goal lut zat tur te, red card hmu tur leh chak zawk tur thlengin ka duh dan angin kha league kha ka thunun thei tihna a ni a, player leh club te pawhin hlawkna an nei ang a, a hlawk ber tur erawh keimah ka ni dawn a ni.

HREMNA A NA DAWN EM?

Mizoram Football Association chuan ngawrh taka a chhui hnuah thutlukna a rawn siam ang a, thuchhuah a rawn nei vat dawn. Chutah chuan thil chiang takin a hriat theih ang.

Hetih lai hian match fixing chungchang hi chu kan hriat ṭheuh angin thil pawi tak a ni a, a hremna pawh a nep dawn lo a ni.

 

 

 

Copyright © inkhel.com 2024. All rights reserved.