Lionel Messi chuan Inter Miami tana a game hmasa ber tur July ni 21 hian a khelh a beiseiawm niin club managing owner Jorge Mas chuan a sawi.

Paris Saint-Germain-a a contract a tawp hnuah Messi chuan MLS lam Inter Miami a zawm a nih kha. Inter Miami chu Eastern Conference-ah a mawng berah awmin, game 17 atangin point 15 chiah an hlawhchhuak.

A rang lamin Messi-a si per hi an mamawh niin a lang a, July ni 21-a League Cup match an khelh hunah Messi chu a inlan nghal dawn niin a lang. Mexican team Cruz Azul an hmachhawn dawn.

Stadium nghet  an la neih loh avanga Inter Miami temporary home DRV PNK Stadium-ah game hi khelh a ni ang

"US-ah hian sport sawi rik a nih chuan Messi lo thlen hma leh thlen hnu hian tehkhin a hlawh reng tawh dawn, football chi tha a ni a, rah tha a rawn chhuah dawn.

"North America leh United States-ah hian khawvela league tha ber a nih loh pawhin a pahnihna tal kan siam thei tih hi ka ring tlat. 

"Khawvela football player ropui ber kan League-a kan seng lut tur hi League tan leh US football ecosystem tan pawh hlawkna nasa tak a ni dawn. Lionel Messi hian danglamna ropui tak a rawn thlen dawn,"tiin Mas chuan a sawi.

Messi chuan Inter Miami-ah kum 2 leh a chanve daih contract a ziak a, Inter Miami hian manager an la nei lo. Messi lo thlen hun tur atan hian security pawh an buatsaih nasa hle  a, a khauh hle dawn niin Mas chuan a sawi.