Zirtawpni zanlai khan 2022-23 Premier League season-a game hmasa ber khelh a ni a, Arsenal chuan Selhurst Park-ah Crystal Palace chu si hnih faiin an hneh.

London derby-ah hian Arsenal tan Gabriel Martinelli chuan goal a khung bakah, Crystal Palace defender Marc Guehi a own-goal bawk a, Gunners hian point thum an hlawhchhuak.

Arsenal manager Mikel Arteta chuan an player thar pahnih Gabriel Jesus leh Oleksandr Zinchenko te bakah, season hmasa a loan-a an chhuah tir William Saliba te chu inkhel bul a tan tir vek a, an pathum hian an khel tha a, French defender Saliba phei chu Man of the Match atana thlan a ni nghe nghe a, hei hi Arsenal tana Saliba game hmasa ber a ni bawk a ni.

Arsenal hian bul an tan tha hle a, inkhel tan tir teah chance tha tak nei nghalin, Jesus-a’n tha taka ball a khalh hnuah, Martinelli chuan chance tha tak a hlah. 20mins velah Arsenal-in goal an khung a, corner atanga ball vawrh luh chu, far post thlanga awm Zinchenko chuan a lo tauh let a, hei hi Martinelli chuan goal-ah lo tauh lutin, Brazilian forward hian tun season-a Premier League goal hmasa ber a khung.

Half time hma lawkin Palace hian an si phurh an sut teuh hle a, hnai set sawt atanga Odsonne Edouard-a ball tauh chu tha zetin Gunners goalkeeper Aaron Ramsdale chuan a lo save.

Si an phurh hnuah Palace in ball an chang hnem zawk a, Arsenal nawr hle mahse Arsenal tlar hnung an si pawp thei lova, second half tir lama Eberechi Eze-a chance neih chu Ramsdale hian a save leh bawk.

85mins-ah Arsenal goal hnihna a lut a, dinglamah Bukayo Saka chu ball pek niin, Saka hian box chhungah ball a lalut a, goal hmazawnah cross pheiin, Guehi chuan tauh chhuah a tumna lamah an goal-ah a tauh lut a, 2-0 in Arsenal hi an chak ta a ni.