Chelsea right-back Reece James chu England squad atangin a inhnukdawk ve leh ta a, England squad atang hian player pali ngawt an inhnukdawk tawh.

Football Association chuan James hi harsatna a neih sa avangin a inhnukdawk tih an puanga, James hian hamstring injury a nei niin chanchinbu mite chuan an tarlang.

Tun international break chhungin England hian Euro 2024 qualifiers game hnih an khel dawna, Ningani zanlai khan Italy chu 2-1 in an hneh tawha, tunah hian Ukraine hmachhawn turin an inbuatsaih leh mek a ni.

Kum 23 mi James hian Italy lakah hian inkhel bul a tan lova, hun tawp dawnah Bukayo Saka thlakin a lut a, tunah hian Chelsea-ah a kir leh tawh niin a lang.

James hi hliamin a tlakbuak fo a, nikum FIFA World Cup-ah pawh khan a khupa harsatna a neih avangin England ai a awh thei tawh lova, December thla khan a khupah bawk harsatna nei lehin, thla khat dang a chawl leh.

England hian Ukraine hi Wembley Stadium-ah an lo mikhual dawna, tunah hian Tottenham Hotspur training ground-ah training an nei mek a, England head-coach Gareth Southgate chuan James-a hmunruak hnawhkhat tu tir hi koh a tum lo.

James hma hian Mason Mount, Marcus Rashford leh Nick Pope te pawh an inhliam avangin England squad atang hian an lo inhnukdawk tawha, anni pathum erawh Italy an hmachhawn hmaa inhnukdawk an ni.