England head-coach Gareth Southgate chuan, Nilaini khan thlaleh Euro 2024 qualifers khel tur England squad a puang a, a vawi khat nan Crystal Palace attacking midfielder Eberechi Eze chu England senior team tana khel tura koh a ni.

England hian June thla hian Euro 2024 Qualifiers inkhelah Malta leh North Macedonia te an hmachhawn dawn a, June thla ni 16-ah Malta an tlawh anga, ni thum hnuah North Macedonia chu Old Trafford-ah an mikhual dawn.

Eze hi tun season-ah Crystal Palace tan a che tha a, Premier League-a Crysta Palace tana a game hnuhnung pariatah goal ruk khungin assist vawi khat a nei bawk.

Chelsea forward Raheem Sterling chu koh loh langsar zual a ni a, mahse ani erawh Southgate nena an inbiak hnuah a hamstring injury a la dam chian loh avangin Southgate hian a ko ta lo a ni.

Chelsea player pathum dang Reece James, Ben Chilwell leh Mason Mount te chu an inhliam avangin England squad-ah an awm lo vek bawk a, England tana vawi khat chiah la inlan Brighton defender Lewis Dunk chu koh a ni thung.

Newcastle United goalkeeper Nick Pope chu a kut zai a ngaih avangin koh a ni lo bawk a, Pope-a aiawh tur hian Crystal Palace keeper Sam Johnstone koh niin, nikum March thla hnuah a vawi khat nan Johnstone hi koh a ni.

Manchester City player pali John Stones, Kyle Walker, Jack Grealish leh Kalvin Phillips te chu koh an ni vek a, mahse June thla ni 10-a Champions League final an khelh dawn avangin squad an zawm tlai dawn a, June thla ni 7-a Europa Conference League final khel tur West Ham captain Declan Rice pawhin squad a zawm tlai dawn a ni.

England squad-

Goalkeepers: Sam Johnstone (Crystal Palace), Jordan Pickford (Everton), Aaron Ramsdale (Arsenal)

Defenders: Trent Alexander-Arnold (Liverpool), Lewis Dunk (Brighton & Hove Albion), Marc Guehi (Crystal Palace), Harry Maguire (Manchester United), Tyrone Mings (Aston Villa), Luke Shaw (Manchester United), John Stones (Manchester City), Kieran Trippier (Newcastle United), Kyle Walker (Manchester City)

Midfielders: Jude Bellingham (Borussia Dortmund), Eberechi Eze (Crystal Palace), Conor Gallagher (Chelsea), Jordan Henderson (Liverpool), Kalvin Phillips (Manchester City), Declan Rice (West Ham United)

Forwards: Phil Foden (Manchester City), Jack Grealish (Manchester City), Harry Kane (Tottenham Hotspur), James Maddison (Leicester City), Marcus Rashford (Manchester United), Bukayo Saka (Arsenal), Callum Wilson (Newcastle United)