Thomas Tuchel chu England manager a ni dawn ta a, tun kar tir atang khan Football Association chuan ngawrh takin an dawr a, nizan khan inremna an nei ta a, vawiin lamah official-a puan zar a nih rin a ni.
Kum 51 mi hian staff a hruai lut ve nual dawn a, hetih lai hian FA lam pawhin staff an thawh dawn bawk a ni. Kar hmasaa a lo sawi tawh angin England interim manager Lee Carsley chu Under 21 team enkawl tura tih a ni leh dawn.
Tuchel-a contract-ah hian, World Cup-a an champion chuan bonus tam tak inpek a ni dawn a, US, Mexico leh Canada tena an thlen tur World Cup 2026 chu an thlir ber a ni dawn a ni.
Pep Guardiola chu FA-in Gareth Southgate thlak nana an awh ber a ni a, kum 53 mi hian tun season bak City-ah contract a nei tawh lo. Hetih lai hian Etihad Stadium-ah a cham chhunzawm zel erawh rin a ni a, Pep hian a hma hun tur a la tifel lo a ni.
Tuchel hian Bayern Munich a enkawl laiin England captain Harry Kane a lo hrawn tawh a, tin, English player eng emaw zat chu Chelsea-ah khan a lo hrawn tawh bawk.
Carsley chuan England-in world class coach an mamawh thu a lo sawi chhuak tawh a, ani hian Southgate a chhuah hnuah England team a enkawl a, Nations League match hmasa pathumah hnehna a chanpui vek a, mahse Greee lakah 2-1 in an tlawm a ni.
Tun nipui lai khan Manchester United pawhin Thomas Tuchel hi an be viau hman, mahse German coach hian United enkawl a tum lem lo a, England manager hna hi a lo nghak zawk nia ngaih theih turin thil a kal.
Tuchel hi England-in an ram senior team enkawl tura ram dang mi an chhawr pathumna a ni dawn ta a, England hian Sven-Goran Eriksson leh Fabio Capello te an lo chhawr tawh a ni.
Tuchel hian Mainz-a a coching career a tan a, Borussia Dortmund leh PSG te a enkawl chhunzawm a, kum 2020 Champions League final pawh a luhpui hial.
January 2021 khan Frank Lampard thlakin Chelsea coach hna a thawk tan a, Champions League no mawi a chawipui a, UEFA Super Cup leh FIFA Club World Cup te pawh a la bawk. Mahse Todd Boehly-a'n Chelsea a enkawl hnuin Tuchel hi a ban ta a ni.
Bayern Munich chuan an ruai leh a, Bundesliga title vawi 33 na a lakpui a, mahse a season hnihnaah erawh pahnihna a nihpui a, season tawp rualin an inthathen a, khami hnu atang khan hna a la nei leh lo a ni.