English Football Association chuan, an ram hmeichhe team enkawl mektu Sarina Wiegman chu contract thar an zawrh niin BBC chuan a tarlang.

Sunday liamta khan hmeichhe Euro final-ah England hian 2-1 in Germany an hneh a, a vawi khat nan Euro-ah an champion.

Wiegman hian kum 2017 pawh khan Netherlands chu hmeichhe Euro-ah hian a lo champion pui tawh bawk a, Euro-a ram inang lo a zawna champion pui thei awmchhun a ni.

Dutch manager Wiegman hian nikum September thla mai khan England hmeichhe team hi a enkawl tan a, FA hian kum 2025 thlenga a contract pawhsei hi an tum mek nia tarlan a ni.

FA lama women’s football hotu ber Baroness Sue Campbell chuan, “Kar hnih vel chawlh a nei dawn a, chuta a lo kir leh hunah chuan contract thar chungchang kan sawipui ang. Chawlh a mamawh a, a hna a thawk tha em em a, nikum September thla mai khan a rawn lut tih hi kan hriat reng a ngai bawk,” tiin kum 52 mi Wiegman-i chungchang a sawi a ni.