England manager Gareth Southgate chuan Nations League atan squad a puang a, a vawikhat nan West Ham United forward Jarrod Bowen a ko.
Three Lions hian June thlaah Nations League hi an khel dawn a Hungary, Germany leh Italy an hmachhawn ang.
Kohna chang thar Bowen hian tun season-ah Hammers tan goal 18 khungin midang pet goal tur vawi 13 a siamsak a, season thara Conference League khel turin London club hi a tlinpui bawk.
Leicester City right-back James Justin pawh a vawikhat nan koh a ni a, Serie A-a AC Milan champion puitu Fikayo Tomori pawh koh a ni veleh ta.
Leeds United midfielder Kalvin Phillips leh Newcastle United defender Kieran Trippier-te pawh an hliam a dam tawh avangin koh zingah an tel.
Liverpool captain Jordan Henderson erawh thlanloh zinga langsar berte zingah a tel thung a, tunhnaia a inkhelh tam deuh avangin an ko lo pawh a ni maithei.
Henderson bakah hian The Reds defender Joe Gomez pawh thlanloh zingah a tel a, Trent Alexander-Arnold tel thungin Liverpool player awmchhun a ni ang.
Jose Mourinho hnuaia parvul Tammy Abraham pawh England jersey ha tur zingah hian a tel a, Roma tan tun season-a goal 27 khungtu hi koh loh phal chi a ni lo.
Chelsea striker hlui hi Dominic Calvert-Lewin aia koh niin forward-ah Manchester City player pathum Phil Foden, Jack Grealish leh Raheem Sterling-te pawh an awm.
Jadon Sancho leh Marcus Rashford-te erawh Southgate hnawl zingah an tel a, Tyrone Mings, Tyrick Mitchell, Kyle Walker-Peters, Emile Smith Rowe leh Ollie Watkins-te tan pawh hmun a awm tawh lo a ni.
ENGLAND SQUAD
Goalkeepers: Jordan Pickford (Everton), Nick Pope (Burnley), Aaron Ramsdale (Arsenal)
Defenders: Trent Alexander-Arnold (Liverpool), Conor Coady (Wolves), Marc Guehi (Crystal Palace), Reece James (Chelsea), James Justin (Leicester), Harry Maguire (Man Utd), John Stones (Man City), Fikayo Tomori (AC Milan), Kieran Trippier (Newcastle), Kyle Walker (Man City), Ben White (Arsenal)
Midfielders: Jude Bellingham (Borussia Dortmund), Conor Gallagher (Crystal Palace, on loan from Chelsea), Mason Mount (Chelsea), Kalvin Phillips (Leeds), Declan Rice (West Ham), James Ward-Prowse (Southampton)
Forwards: Tammy Abraham (Roma), Jarrod Bowen (West Ham), Phil Foden (Man City), Jack Grealish (Man City), Harry Kane (Tottenham), Bukayo Saka (Arsenal), Raheem Sterling (Man City)