Fan-te'n a replica goalkeeper kawr an lei thei lo chu na a tih thu England goalkeeper Mary Earps chuan a sawi. 

Kum 30 mi England goalkeeper hi nikum khan khawvela goalkeeper tha berah thlan a ni a, European Championship-ah Lionesses a champion pui avangin Fifa Best award hlan a ni.

Nipui World Cup atana England kit hi Nike siam a ni. Manchester United-a Earps-i kit bik hi season khelh zawh takah khan hralh zawh a ni a, hmeichhe goalkeeper kit thar siam hi Nike commercial strategy-ah a tel lo.

England mipa team kawr erawh size hrang hrang lei theihin a awm a, mipa goalkeeper kawr hi England-ah leitur awm chiah lo mahse hmun dangah leitur a awm.

Earps chuan a kit hi mipui lei theihin a awm dawn lo tih hriattir a ni lo a, outfield kit an hralh chhuah hnuah a hriat chauh thu a sawi.

"Ka chhungkua leh ka thian hnai tak takte ngei pawhin ka kit an lei thei dawn lo tih ka hriat khan hreawm ka ti lutuk, na ka ti khawp mai.

"Ka teammate-te'n an chhungkua leh thiante tan an kit an order sup sup a, kei chuan ka ti ve thei lo. Mi tam takin outfield kawr man to tak takin an lei a, number one 'Earps' tih an ziak chawp tih ka hriat phei chuan hreawm ka ti khawp mai.

"Ka tan hian a lawmawm thlawt lo a, thup mawi pawh ka tum hran lo. Ka kawr hi lei theihin a awm khat hrim hrim a, online phei chuan vawihnih khat chiah lei theihin a la awm. A in hlut loh thlak ka ti, "tiin Eraps chuan a sawi.

BBC chuan insawifiah turin Nike lam an be pawp a, Football Association chuan engmah an sawi duh lo.