England forward hlui Trevor Francis chu kum 69 mi niin a thi a, Francis hi Spain-ah heart attack avangin a thi tih chanchinbu mite chuan an ziak.

Kum 1979 khan Birmingham City atangin Nottingham Forest chuan Francis hi pound maktaduai 1 in an lei chhuak a, Francis hi Bristish footballer zinga pound maktaduai 1 man kai thei hmasa ber a ni nghe nghe a ni.

Forest-ah hian European cup vawi hnih a chawi a, a ram England tan game 52 khelin, goal 12 a thun a, inkhelh a chawlhsan hnuah Francis hian management lam a luhchilh a, a coaching career-ah Queens Park Rangers, Birmingham City, Sheffield Wednesday leh Crystal Palace te a lo enkawl tawh thin a ni.

Kum 11 liamta khan Francis hi heart attack avangin a lo tlu tawh a, mahse hemi tum hian dam chhuak lehin, uluk takin a inenkawl chhunzawm nia sawi a ni a, mahse vanduaithlak takin heart attack avangin a thi ta a ni. Fracis-a nupui Helen chu kum 2017 khan cancer avangin a lo thi tawh a, Francis-a hriselna pawh hian a tuar zui hle niin chanchinbu mite chuan an tarlang.

Kum 1979-a Forest a zawm hma hian English top flight league-ah Francis hian game 280 a khel hman a, goal 119 lai a thun a, Forest a chhuahsan hnuah Manchester City-ah insawnin, hemi hnu hian Italy lamah kalin Sampdoria leh Atalanta tan te a khel.

Italy atang hian UK-ah kir lehin Scottish club Rangers a zawm a, Rangers atang hian Queens Park Rangers-ah insawnin, hetah hian a professional career a khar. Kum 1994 khan Francis hian kum 40 a tlin hma hretin inkhelh a chawlhsana, a professional career-ah game 632 khelin goal 235 a thun a ni.