Manchester United winger Antony chuan dim lo taka amah sawiseltu pundit-te a chhanglet.
Kum 23 mi hian Ajax atanga Old Trafford a pan hnuah sulhnu tha ala nei lova, a luh tirhin thawm nei lian viau mahse beisei ang ani thei meuh lo. United hian a manah £85m vel sengin, 2027 nipui thleng daih contract an ziahpui a, khelmual chhung chauh nilo pawn lam thlengin buaina a nei.
A chhas hlui Gabriela Cavallin chuan kutthlakah a puh a, Brazilian news outlet UOL hnenah thil engkim hrilhin buaina lian tak a nei. Cavallin puhna ang tho hian, a bialnu ni thin Rayssa de Freitas leh Ingrid Lana-te pawhin thubuai an thehlut a, thla khat vel chawlh phahin club lam pawh a tibuai hle.
Chanchin an neih tan lai hian Brazil camp-ah a awm a, khelh tur match hnih nei mahse squad atanga chhuahtir a ni. Red Devils pawhin suspend ni si loin chawlh an pekbelh a, kum 23 mi buaina neih hi an ngai thutak hle tih thuchhuah siamin an sawi. Cavallin sawi danin, thil thleng hi kumin kum tir lamah khan a ni a, Manchester hotel pindan pakhatah niin kut a tuar ngei tih a sawi.
Antony hian puhna a dawn zawng zawng a pha vek a, in tih hmingchhiat tumna tiin a tang na hle. Kum 33 mi Lana hian nikum Khuangchawi thla khan kut a tuar tih Brazilian chanchinbu Record TV a hrilh a, Antony hian bang a tauh tir niin a sawi. Freitas thung hi chuan Antony laka khinna a thehluhte a hnukdawk niin Express-in an ziak a, inhnamhnawih vak a duh lo niin a lang.
Antony hian season kal mekah game 15 a khel tawh a, goal khung chu sawi loh midang tih goal tur tak ngial pawh ala siamsak lo. A pawn lam nun aiin khelmuala a sulhnuin sawizui a hlawh a, sawiseltu a neih zingah hian United player hlui Gary Neville, Rio Ferdinand leh Paul Scholes-te pawh an tel.
The United Stand-in an kawmnaah Brazilian winger chuan, "United player hlui leh pundit thenkhatte'n na tak takin min sawisel a, awmze nei loin ngaihdan an sawichhuak hreh miah lo. Boruak leh huhang an neih len avangin mi tam tak an hip a, ka inkhelh loh lai pawhin ka chanchin an sawi bang lo. A tha zawngin engmah an thlir ngai lova, thil tha sawi nise chuan ka thatpui zawk ngei ang.
"Tute mahin ka awm dan min zawt lova min ngaihsak tumah an awm lo. Hun harsa ka hmachhawn mek hi a hrehawm a, ka paltlang theih nan theihtawp tak meuh meuh ka chhuah. An rilru leh midang ngainat tura nia an hriatte an sawi a, a taka ka thil tawn min hmuhpui lo." tiin a sawi.
United tan hian intihsiakna hrang hrangah vawi 59 a inlan tawh a, sawilan tawh angin fak tlaka khawsak tum a nei khat hle. Thlasik transfer hunah a chhuak dawn tih thawm a awm a Old Trafford-ah a nghet thei tak tak lo. Manchester Derby-a Manchester City an hnehloh tum khan pundit-te'n an sawisel nasa khawp mai a, tul lo takin Jeremy Doku a pet thluk avangin red card a hmu teuh hle a ni.