Saudi Arabia-a Supercopa de Espana final match-ah Barcelona chuan 5-2 laiin an hmelma Real Madrid an sawp a, El Clasico-ah hian Real Madrid hian an khingpui hi an khan lo hle.
King Abdullah Sports City-ah hian Mbappe chuan goal hmahruai khung mah se, Raphinha chuan goal hnih a khung a, Yamal, Lewandowski leh Balde te chuan goal khat theuh an khung a, Real Madrid tan Rodrygo chuan goal khat a khung ve leh bawk.
Barcelona-in inkhelh bul an tan tha a, chance hlauhawm pawh an nei nghal nual. Mahse counter attack hmangin Real Madrid chuan goal an khung hmasa. Mbappe chuan solo goal mawi tak minute 5-naah a khung.
Real Madrid hian hma an hruai rei lem lo. Minute 22-ah Robert Lewandowski ball pek tha tak chu Yamal chuan khalhin, box chhung a thlenpui hnuah goalkeeper veilamah mawi lutukin a chhuih goal.
Darkar chanve an khel tling vel chiah tihin Barcelona chuan penalty an hlawhchhuak. Box chhungah Camavinga chuan Gavi a tlawh thlu, referee chuan VAR hmangin a ennawn a, penalty a ham a, he penalty hi Lewandowski chuan goal-ah a chantir.
He goal a luh atanga minute 3-na lekah Raphinha chuan mawi lutukin a tauh goal leh nghal. Mual dinglam sir atanga Jules Koundé cross tha lutuk chu changtu nei lo Raphinha chuan a duhtawkin a tauh a, 3-1 in Barcelona chuan hma an hruai ta der mai.
Álex Balde chuan hnai set sawt atangin a shot a, hei hi Courtois chuan a lo dan sak, hemi hnu lawk first half tawp hmain Álex Balde hian goal a khung ta nge nge. Raphinha ball pek tha lutuk chu bottom corner-ah Álex Balde hian a chhuih lut a, half time a nih chuan 4-1 laiin Barcelona chuan hma an hruai.
Second half tan a ni a, Rodrygo chuan kawh lutukin a volley, Barcelona cross bar a per dawp mai. Goal erawh Barca lamin an khung chhunzawm leh. Marc Casado through ball tha lutuk chu Raphinha chuan mual veilam sirah a um a, box chhung a thlenpui hnuin mawi lutukin a chhuih goal leh a, 5-1 a ni ta.
Minute 56-ah Barcelona goalkeeper Szczesny hnawhchhuah a ni. Mbappe free ball um chu box pawnah Szczesny hian a titlu, referee chuan direct red card a phawrh a, Szczesny a chhuak. He free kick hi Rodrygo chuan mawi lutukin goal-ah a chantir.
Minute 56 atangin Barcelona hi kim loin khel mah se, Real Madrid hian goal khat bak an khung thei ta lo a, 5-2 in Barcelona chuan hnehna an chang a, Super Cup-ah Barcelona chu a vawi 15-nan an champion ta a ni.
Barcelona hmatawng te an hmuhnawm a, chutih rualin Real Madrid tlarhnung an talbuai tluan zak kan ti thei awm e. Barca hmatawng ten hmun thawl tak tak an nei a, goal an chhuah pup pup avangin a tam zawk an nih hnu pawhin an comeback thei ta lo a ni.
Nikum Super Cup final-ah khan Real Madrid chuan Barcelona hnehin, no mawi an chawi a nih kha. Yamal chuan an no mawi lak let a tum thu kar hmasa khan a lo sawi tawh a, a sawi ang ngeiin hnehsawh takin no mawi an chawi ta a ni.