Hugo Ekitike chungchangah Liverpool leh Eintracht Frankfurt te chuan inremna tluantling an nei ta niin The Athletic chuan a tarlang.

Liverpool hian Ekitike manah hian £69million an pe phawt ang a, add-ons hi £10m a tel dawn bawk a ni.

Liverpool-a medical a neih zawhah Ekitike hian kum 6 chhung atan contract a ziak ang a, Hongkong lamah Liverpool pre-season tour a zawm ve nghal dawn a ni.

Inrinni khan mimal thilah Ekitike leh Liverpool te hian inremna an nei tawh a, a man inpek dan tur chungchangah vawiin khan club pahnih te chuan inremna an nei leh ta a ni.

Newcastle United khan Frankfurt atanga Ekitike lakchhuah an lo tum ve tawh a, €75m thehchhuak mah se, hei hi German club hian an lo hnar.

Liverpool hian Newcastle United striker Alexander Isak an ngaihven tho a, mahse Magpies lamin hralh an phal lo a, indawrna an chhunzawm ta lo nia report a ni.

Tun nipui bazarah hian Arne Slot chuan Florian Wirtz, Jeremie Frimpong leh Milos Kerkez te an la lut tawh a, Ekitike hi an la leh dawn ta a ni.

Diogo Jota a awm tak lohah chuan Liverpool hian an hmatawng thawmthat an mamawh a, Darwin Nunez chu club danga chhuak tur angin thu a thang mek a, Luis Diaz pawh Bayern Munich lamin an ngaihven mek bawk.

Ekitike hian season liamta khan Frankfurt tan goal 22 a khung bakah assist vawi 12 a nei a, PSG atanga Frankfurt-in an leina man kha €17.5m kha niin, tunah man to takin an hralh leh ta a ni.