Liverpool chuan Hugo Ekitike lak tumin theihtawp an chhuah mek a, Eintracht Frankfurt nen inbiakna mumal tak an nei chho mek.

Liverpool hian Ekitike manah hian €80million (£69.2m; $92.7m) an thehchhuak a, mimal thilah chuan harsatna an nei lo niin The Athletic chuan a tarlang.

Ekitike hi Newcastle United pawhin lak tumin hma an la a, kar tir lamah khan Newcastle chuan €75million (£64.9m; $86.9m) nen Frankfurt an dawr, hei hi hnawl a ni.

Season liamta khan kum 23 mi Ekitike hian competition hrang hrangah Frankfurt tan goal 22 a khung bakah assist vawi 12 a nei. Kum 2024 khan Bundesliga club hian €17.5m-in an lei a, an hralh leh nghal a nih chuan an hlep tam dawn hle a ni.

Liverpool hian Newcastle United atangin Alexander Isak lak an tum a, mahse Magpies hian an striker hi hralh an phal lo. Chutih laiin Isak an chelh theih loh tak palhin tiin Ekitike hi an ngaihven ve leh bawk a, Liverpool nen an inchuh ta a ni.

Diogo Jota a awm tak loh avangin Liverpool hian hmatawng thawmthat an mamawh hle. Darwin Nunez pawh chhuah an phalsak nia report a ni a, Luiz Diaz pawh club lian pahnihin an ngaihven mek bawk.

Liverpool hian tun nipui bazarah Florian Wirtz, Jeremie Frimpong leh full-back Milos Kerkez te an la lut tawh a ni.