Dinamo Bucharest leh Cameroon midfielder Patrick Ekeng boral chungchangah thu thar a awm a, a unaunu in Ekeng hi an inkhelh hma khan a chau hle tih a sawi.
Kum 26 mi Ekeng hi Romanian league-a Dinamo leh Viitorul inkhelh tumin minute 70-naah a tlusawp a, damdawi in panpuia nih hnuin a boral.
Ekeng unaunu Monique Chantal chuan, "A thiante hnenah a khelh theihloh tur thu a sawi a, a chau hle tih a sawi tel bawk."
"Patrick kha mi thil phal leh fel a ni a, hetiang a tleng ta hi a pawi takzet a, mangchhia ang mai a ni." tiin BBC Sport hnenah a sawi.
Ekeng-a nu Celine Chemi pawhin an chhiatna tawh chungchang hi sawi a duh rih lo tih a sawi a, a fapa vanduaina hian midang tan fimkhurna a thlen a beisei thu a sawilang bawk.
Kum 2012 khan Nigeria leh Romanian club CS Deilta Tulcea midfielder Henry Chinonso Ihelewere chu pre-seaon match-a FC Balotesi nen an inkhelh laiin alo boral tawh a, hei vang hian Romanian Players' Union/Asociatia Fotbalistilor Amatori Si Nonamatori (AFAN) chuan Romanian football federation hnenah official match emaw friendly match-ah reng rengah bungraw nei tha tawk tak Ambulance chhawp turin thurawn an pe a, hei hi tih hlawhtlin a nilo tih AFAN president Emilian Hulubei chuan a sawi.
Dinamo Bucharest lam chuan Ambulance pathum lai an inchhawp tih an sawi a, rikrum thila hman theih vek ani tih an sawilang bawk.
Dinamo team doctor Liviu Batineanu chuan, "Khelmuala player a tluk khan a rang thei ang berin kan tlan lut nghal a, referee phalna pawh kan ngaichang hman lo. Kan theihtawp chu kan chhuah." tiin a sawi.
Ekeng boral vang hian Romanian Football Federation chuan Dinamo leh Cluj-in an khel tur Romanian Cup final chu May ni 17-a khelh turin an sawn a, tunkar tawpa inkhel awm tur zawng zawng pawh a hun sawn hlat vek a ni.