Chanchinbumite chuan Ederson chu Manchester City chhuahsan tur angin thu an vawrh darh nasa, mahse City goalkeeper hian Etihad Stadium-a a cham chhunzawm zel tur thu a sawi chiang.

Nikum nipui bazar inhawn lai atang tawh khan Ederson chu Saudi Pro League lam pan tur angin an sawi tawh. Tun nipui bazarah pawh chhuak tur angin thu a thang mek zel a, Ederson chuan heng chanchin ho hi thu dik lo a nih thu a sawi chhuak a ni.

Ederson hian Etihad Stadium-ah kum 1 daih contract a la nei a, Manchester City tana Champions League no mawi chawi leh a la tum thu a sawi bawk.

"Ka chhuak dawn reng reng hleinem. Ka thian thenkhat ten ka chungchang an sawina chanchinthar min rawn thawn hlawm a, heng ho hi 99 percent chu thu dik lo a ni e. Ka hming lam hian thu dik lo an lo chhuah nasa hle a ni.

"City-a cham chhunzawm ka tum a, Premier League leh Champions League no mawi chawi nawn leh ka tum mek a ni," tiin kum 31 mi Ederson chuan a sawi.

Season liamta khan Manchester City chuan trophy pakhat pawh an chawi lo. Pep Guardiola-a'n Manchester City a enkawl atanga trophy an chawi loh vawi khatna a ni nghe nghe.

USA lamah City hi Club World Cup khelin an fehchhuak mek a, "Real Madrid pawh kan hmaah lo ding pawh nise, hneh tumin kan bei ang. Engkim hmachhawn turin kan inpeih reng a ni.

"Club World Cup kalphung hi a thar a ni a, trophy thar a ni bawk. He trophy chawi hmasa ber tur hian kan team hian theihna kan nei a ni. Champion tan a hlu dawn, history-ah a chuang reng tawh dawn a, he title la thei hmasa ber nih hi kan tum a ni," tiin Ederson chuan a sawi bawk.