Video games publisher lar tak Electronic Arts (EA) chuan an video game lar ber zinga mi FIFA chu an titawp tawh dawn tih an puang.

EA hian khawvela foobtall thuneitu lu ber FIFA nena an inzawmna an titawp tawh dawn a, licence man a to bakah, game kalhmanga huang an zauh duh avangin EA hian FIFA nena an inzawmna an chhu chat dawn a ni.

Kumin kum tawp lam hian FIFA 23 a chhuak dawn a, hei hi EA-in FIFA game a siam a edition hnuhnung ber a ni tawh dawn a, hemi zawh hian EA Sports FC angin an kalpui tawh dawn a, nakkum kum tawp lamah EA Sports FC edition hmasa ber hi chhuak hman tura ngaih a ni.

EA hian kum 1993 khan FIFA game hmasa ber hi an siam a, vawiiin thlengin khawvel puma video game lar ber zinga mi a ni chho ngar ngar a, pawisa tam tak FIFA game atang hian an lalut tawh bawk.

EA leh FIFA te contract ziah hnuhnun ber hi kum 2013 khan a ni a, heta hian kum sawm chhung atan an inrem a, tunah erawh FIFA hian licence man ti to in, four-year World Cup cycle chhung atan licence man hi $1billion chuang nia tarlan a ni.

FIFA hian EA Sports nen an inzawmna tawp mah se, FIFA game thar siam chhuah an tum thu an sawi ve nghal a, FIFA hian game publishers lian ber ber leh media company bakah investor te nen kum 2024-a FIFA game thar tihchhuah hman tuma hma an lak thu an puang a ni.

EA hian FIFA nena an inzawmna titawp mah se, a tam zawkah Pro Evolution Soccer angin club hming lem an hman ve a ngai dawn lova, tunah hian footballer 19000, team 700, stadium 100 leh league 30 chuang nen contract an nei mek a, mahse World Cup leh FIFA: Road to World Cup 98 te a awm thei tawh dawn lo thung.

EA in league hrang hrang inremna an neihpui zingah Premier, Bundesliga, La Liga leh UEFA te an tel a, league lian tak tak leh Champions League thlengin an kal ngaiin an kal chhunzawm thei dawn a ni.