An intawn leh hmasak berah Durtlang North-in 2019 final-a an tlawmna chhang letin set thum set hnihin champion lai Chhinga Veng Spikers an hneh a, May ni 6, 2022 (Zirtawpni) zanah Zothan Autoworks Pro Volleyball League inkhel hmasa berah an chak.
R Dengthuama Indoor Stadium, Mualpuiah Haryana atanga an lak luh Sagar Malik chuan Durtlang North tanpuiin, Fabian Lallunghnema'n hnehna kawngah team a hruai bawk a, 25-22, 23-25, 17-25, 25-17, 15-13-in Spikers lakah an chak.
Sagar chuan point sarih a paih laiin 31 a thawk chhuak a, tlar hnunga a awm lai pawhin Durtlang North chhanhimtu berah a tang a, D3 Business Player of the Night lawmman dawng hmasa ber niin Kolasib spiker Fabian-an point 19 hmuin vawi ruk a tisual ve thung a ni.
Kum thum kal ta khan 25-23, 18-25, 22-25, 31-29, 15-13-in Durtlang North lakah Chhinga Veng an chak a, derthawng taka an awm hnuah a vawi khat nan Pro Volleyball-ah an champion.
Covid-19 leng avanga kum hnih thulh zawn a nih hnuah Chhinga Vengin title humhim ngei turin bul an tan a, a tir lamah captain Lallianmawia Pachuau chuan team fuih phurin set hmasa berah 11-6-in hma an hruai hman.
Mahse, Karnataka atanga an lak luh Sujith Acharya a insiam rem nghal lo va, point a hloh hnem hle laiin Fabian-a leh Sagar chuan Durtlang North nawr kalin an lehpel a, 24-22-a hma an hruai laiin Vanlalmawia'n Sujith-a vuak dang thlain set hmasa ber an la. Set hnihna atangin Chhinga Vengin hma an sawn a, Lianmawia a tangkaiin Sujith chuan awmze neiin a khel thei tawh a, inelna sang tak karah chungnung zawkin inkhel boruak a nung thar nghal bawk.
Spikers-in set thumna thunun zuiin rinrawl Lianmawia leh Sujith bakah Lalnunpuia leh Ramengmawia'n team tichakin inringtawk takin an khel a, Lianmawia'n chiang taka a vuak tlak rualin Dutlang North-in point 17 chiah an hmu ve hman a ni.
Durtlang North tan set hloh a thiang tawh lo va, Sagar chuan team mamawh chhangin inkhel boruak an tidanglam a, set linaah derthawng lovin hma an hruai tluan. Set ngana leh a chak tur chin felna hnuhnungah Durtlang North-in team nghet leh tlo zawk an nihna an lantir thei a, Fabian-a'n vaw tlain 9-6-in hma an hruai.
Spikers-in um zel mah se an hnaih chilh thei lo va, hun pawimawhah Sagar-an Durtlang North kalpuiin vawi thum a hlap tla zawn a, 14-13-a hma an hruai laiin Lalbiakmuana'n a hlap thla a, Chhinga Veng laka rilru na taka an tlawm tawhna chhang letin hlim takin hnehna an lawm zui a ni.
Hnehna hlu tak an chan rualin veikhawr Biakmuana erawh a langsar zo lo va, an inkhelh chhungin point ruk hmuin vawi li a tisual.
Hetih lai hian Durtlang North tan Vanlaltanpuia'n point ruk tho hmuin point hnih a hloh ve thung a ni. Chhinga Veng tan Sujith chuan point 30 hmu mah se point 19 a hloh a, Lianmawia'n point 19 thawk chhuakin tum li tihsual nei mah se fel fai takin a khel ve thung a; Nunpuia'n vawi 11 vaw tlain point li a hloh a, Ramengmawia'n point kua hmuin point thum a hloh.
Player khaikhinin Chhinga Veng an inkhairual zawk mah se Durtlang North tan point pawimawh leh boruak sangah Sagar leh Fabian-a an rin tlak a, intiat tawk tak chungin team pahnih inkarah danglamna an siam thei a ni.
Kar leh May ni 9 thawhtanniah Chhinga Vengin an khel leh nghal dawn a, Mizo hlanga inlan tur awm chhun TNT an hmachhawn ang.
May 11, nilaini zanah Durtlang North-in vawi hnih champion tawh Hunthar an khelhpui ve thung dawn a ni.
RESULT :
Durtlang North def Chhinga Veng Spikers - 25-22, 23-25, 17-25, 25-17, 15-13 (3-2)
D3 Business Player of the Night - Sagar Malik (Durtlang North)
Play stats : DURTLANG NORTH
Sagar Malik : point hmuh 31, point hloh 7
Fabian Lallunghnema : point hmuh 19, point hloh 6
Vanlalṭanpuia : point hmuh 6, point hloh 2
Lalbiakmuana : point hmuh 6, point hloh 4
CHHINGA VENG SPIKERS
Sujith Acharya : point hmuh 30, point hloh 19
Lallianmawia Pachuau : point hmuh 19, point hloh 4
Lalnunpuia : point hmuh 11, point hloh 4
Ramengmawia : point hmuh 9, point hloh 3
FIXTURE LEAGUE :
May 09, thawhtanni - 8m : Chhinga Veng Spikers v TNT (mipa)
May 10, thawhlehni - 3pm : Durtlang v Bungkawn (hmeichhia)
8pm : Bethlehem Vengthlang v Kanan (hmeichhia)
May 11, nilaini - 8pm : Durtlang North v Hunthar (mipa)
May 12, ningani - 8pm : Tuichangral v TNT (mipa)
May 13, zirtawpni - 3pm : Durtlang v Bethlehem Vengthlang (hmeichhia)
8pm : Bungkawn v Kanan (hmeichhia)
========
THUTAK NUNPUITU TEAM Thutak Nunpuitu Team-in coach thar hnuaiah an elpuite lakah rin hlawh lo mah se innghahna hran nei chungin Zothan Autoworks Pro Volleyball League an khel dawn. 2016-a Pro Volleyball kalpui a nih atanga la tel kim vek team pahnih zinga mi TNT-in a hnuhnung ber 2019-ah chhe takin championship an khar a, team pasarih inel zinga hniam ber an ni.
Coach atan Pro Volleyball-a tawn hriat nei lo Lalhmangaihsanga Sailo ruaiin May 9-ah bul an tan dawn a, champion lai Chhinga Veng nen an inhmachhawn ang. Hmangaihsanga chuan Pro Volleyball inkhel a la en loh thu sawiin inelna sanga tel turin an inpeih em tih a hrethiam lo va, chona thar hmachhawn turin Pathianah an innghat tih a sawi a, inpeih turin theihpatawpin an inbuatsaih tih a sawi.
TNT-in team tidanglam turin player tha leh boruak nei lak luh an nei lo va, tum dang ang bawkin Mizo hlangin an khel leh dawn a, an innghahna ni fo tawh Laldinchhunga, Sadraka leh Lalrinzuala Hnamte an chhawr leh dawn a ni.
Captain Vanlalchhantluanga Sailo chuan duhthusam player an nei lo tih a pha lo a, Pathiana innghat an nih angin thlarau bote chhandam nan an khel thin tih a sawi.