Duh angin City ka zawm hnuah ka khel tha lo: Grealish

22nd September 2022, 01:09PM

Manchester City winger Jack Grealish chuan, Etihad Stadium-a a input luh hnuah, duh anga a la khelh that loh thu a sawi a, Aston Villa-a a khelh dan leh City-a a khelh dan a danglam thu a sawi bawk.

Nikum nipui bazar lai khan pound maktaduai 100 lai sengin City hian Grealish hi Aston Villa atangin an lei a, Grealish hi British player man to ber ni mah se, City a zawm hnuah a man phu in a la khel lo.

Sky Sports-in an kawmnaah kum 27 mi chuan, “City-a ka luh hnuah ka duh angin ka la khel tha tawk lova, ka khel tha thei tih lan tir thin mah ila, a la tha tawk lo. Villa-a ka khelh thin dan leh City-a ka khelh dan a danglam hlak a, Villa-ah khan ka zalen zawk a ni,” tiin a sawi.

Season hmasa khan Grealish hian Premier League-ah goal thum khungin, assist vawi thum a nei bawk a, club lamah duh angin khel tha lo mah se, a tan England squad-ah hmun a la awm zel a, City-a an manager Pep Guardiola pawhin a thlavang a hauh.

City a zawm hma khan Grealish hi Aston Villa captain niin, an player pawimawh ber a ni a, City-ah hian a insiamrem chhoh zel a rinawm a, a inhliam lo a nih chuan City player pawimawh tak a la nih ngei a rinawm a ni.

Copyright © inkhel.com 2022. All rights reserved.