Mizo boxer pathum - Lalrinsanga Tlau, NT Lalbiakkima leh Laldingliana te chuan Grassroot Management kaltlangin Dubai-ah professional bout an nei zo ta a, tlawm lovin an chak vek.

Mizo boxer-te hian kan ram ṭhenawm Pakistani boxer vek an hmachhawn a, an khelh a hmuhnawm hlawm hle.

NT Biakkima 'Zo Keite' hian a khingpui Fida Muhammad chu Second Round-ah knockout-in a hneh a, Lightflyweight-ah vawi li khel tawhin tlawm ala nei miah lo va a tumpuite ala knockout vek bawk.

Zo Keite hi IBA Intercontinental champion vawihnih ni tawh a ni a, kum 2018 khan World No 1 leh Olympic champion ni lai Hasanboy Dusmatov alo hneh tawh bawk.

Lalrinsanga Tlau (Sangtea) pawhin professional boxing-a a zinkawng zawh mekah tlawm ala nei lo tluang zel a, Dubai-ah hian Muhammad Sikandar chu Unanimous Decision hmangin a hneh.

Kum 2021-a WBC Youth Champion Sangtea hian professional boxing-ah vawisarih khel tawhin tlawm ala nei lo va, Super Feather Weight category-ah a awm mek.

LPS Pro Fight Bantam Weight-a champion kawnghren hreng mektu Laldingliana pawhin Unanimous Decision bawkin a tumpui Mohammad Ahmed Kakkar chu a hneh a, professional huang chhungah a tlangnel tial tial.

Heti hian Laldingliana hian professional boxing-ah vawithum khel tawhin ala chak fai vek a, National Youth Boxing Championship-ah pawh Bronze Medal alo hnekchhuak tawh bawk a ni.

INHNEK DANG RESULT:

Shaikhom Rebaldo def Mukhtiar Ahmed Kakar (unanimous decision)a

Fizan Anwar def Yameen Khan (TKO)

Sarjubala Devi def Lulu Kayage (unanimous decision)