Oleksandr Zinchenko chuan Arsenal-ah hmun a chang lo mek a, tun thlasik bazarah hian chhuah a duh niin Mirror chuan a tarlang.

Kum 2022 July thla khan Zinchenko hian Manchester City atangin Arsenal a pan a, a man kha £30million nia report a ni. Gunners player pawimawh tak a ni chhunzawm a, Man City el phak ber team an ni chho.

Hetih lai hian Arsenal chuan Riccardo Calafiori an la a, academy atangin Myles Lewis-Skelly a rawn lang hlawl bawk nen. Ukranian defender hian Arsenal-ah hmun a chang tam thei ta lo. Tun season-ah pawh competition hrang hrangah vawi 13 chiah a la inlan a, vawi 4 chiah inkhelh bul a tan bawk.

Calafiori leh Lewis-Skelly te inlan theih loh changin Zinchenko hi a inlan a ni ve ta chauh mai. Telegraph-in a tarlan danin, Borussia Dortmund chuan Zinchenko hi an duh a, Arsenal lam pawhin tun January thla hian chhuahtir an hnial lo niin media te chuan an tarlang bawk.

Dortmund hian Chelsea defender Ben Chilwell pawh an ngaihven, hetih lai hian Zinchenko hi an duh hmasak zawk a ni a, BVB hian lak an tum tak tak a nih chuan, Zinchenko-a kawng hi Arsenal chuan an dal dawn lo niin Telegraph chuan a tarlang bawk.