Khawvela basketball league ropui ber NBA huanga lut turin lehkha zir sang tak nih a harsa angreng hle a, college basketball player zingah NBA lama lut zui hi chuti takin an tam lo a. Hetianga NBA an luhchilh tawh vek vek erawh chuan team hrang hrangin hlawh an pe tha thei em em thung a ni.
NBA luhchilh fuh tawh vek vek chu sum lamah an ngaihtuahawm lo thei hle a, lemchan thiam tam tak ai pawhin sum an la lut tha zawk a. Player langsar deuh hlekte phei chu an hlawh piah lama pawisa an lak luh hi a tam tham hle a, fakna chi hrang hrang atang tein an hui teuh teuh tawh mai a. NBA player hlawhtling ni turin lehkha zir sang ber ber nih a ngai kher lo a, lehkha zir sang deuh hlek erawh an awm ve hlawm a ni.
Basketball player lar ber pawl ni thei, chutiang dinhmuna din hnua doctorate degree nei thei hi pakhat chu a awm a, tun hma leh tun hnuah pawh chutiang dinhmuna ding thei awm chhun a la ni nghe nghe a. Shaquille O'Neal chuan doctorate degree pangngai a nei a, amah chiah hi pangngai taka degree nei thei an la awm a ni.
Dikembe Motumbo chuan Georgetown atang leh Haverford atangin doctorate degree chu a nei ve ve a, chutih rualin a degree neih hi honorary degree ve ve a ni a, zirna kaihhnawih thil a nih loh avangin Shaquille O'Neal nen hian huang khata dah chi a ni tlat lo.
Shaquille O’Neal chu kum thum chhung Louisiana State University (LSU) ah a kal hman a, chu mi hnuah NBA huangah a lut a. Shaq hian a nu leh pa hnenah basketball khelh thlang mah se bachelor’s degree chu neih ngei a tum thu a hrilh a, chutiang puitlin ngei tur chuan thu a tiam nghe nghe a ni.
Thu a tiam tawh ang takin 2000 kumah khan O’Neal chuan bachelor of arts degree a nei ta nge nge a. He mi hnuah hian University of Phoenix atangin business-ah master’s degree a nei leh a. Master’s degree hi a la duhtawk mai lo a, Barry University atangin business-ah hian doctorate degree a la zui leh bawk a ni.
O’Neal hi Ph.D. chu a ni lem lo a, chuti chung chuan Human Resource Development-ah doctorate in education (Ed.D.) chu a dawng tho a. Doctorate degree dawng thei tura a topic chu ‘The Duality of Humor and Aggression in Leadership Styles’ tih a ni.
Zirna lamah mi tam tak tih theih loh a ti thei a, basketball court lamah lah player vantlang chung lam daihah a leng thei bawk a. LA Lakers chu title vawi thum a lakpui bakah Miami Heat chu vawi khat a lakpui bawk a. NBA huanga center ropui ber pawl tia sawi a hlawh a, zirna leh basketball lamah pawh sulhnu ropui tak a nei thei ve ve hi a ropuina tizualtu a ni.