French club Lyon chu sum lama harsatna an tawh avangin Ligue 2 lamah paihthlak an ni tih The Direction Nationale du Controle de Gestion (DNCG) chuan a puang a, hetih lai hian Monaco, Nantes leh Paris FC lakah erawh hremna lek a ni lo thung.

DNCG hian hremna an puan hnu lawkah Lyon chuan an chunga hremna an lek hi khin let an tum thu an puang ve nghal.

Ligue 1 champion vawi 7 lo ni tawh Lyon hi nikum lam khan DNCG chuan an sum dinhmun chingfel turin an lo ti tawh a, kumin June ni 30 hmain an bat te an tlak theih tak loh avangin an chungah hian hremna lek a ni ta a ni.

Lyon hi Eagle Football Group ta a ni a, anni hian Lyon club stake 77% an nei a, heng zinga 43% lai chu sum tuak nan an lo hralh tawh bawk. 

Eagle Football Group neitu John Textor chuan nikum lam khan an sum dinhmun a ziaawm thu leh, an relegate dawn loh thu a lo sawi tawh a, "A sum faiin kan kawl hnem a, tun season-ah pawh tha taka khelh chhoh kan tum zel a ni," tiin a lo sawi tawh bawk. Mahse an insawi ang a lo ni lo deuh niin a lang.

Olympique Lyonnais hian an chunga hremna lek hi an khing hneh ang em? Hei erawh hriat a ni lo. Hetih lai hian kum 2023 khan Nancy chu sum lama harsatna an tawh avangin division hniam zawka paihthlak an ni a, Nancy hian an khing let a, hnehna an chang a nih kha.