Liverpool forward Diogo Jota chu car chesualah a boral niin BBC chuan a tarlang.
Kum 28 mi Jota hi a unaupa Andre Silva nen car-in Spain khua Zamora-ah an chesual a, an thi ve ve niin BBC chuan a tarlang.
Jota leh a unaupa Silva te hi Lamborghini-ah chuangin, local time dar 12:30 AM khan an hmaa motor tlan lehpelh an tum a, an car ke a puak a, an chesual zui niin media te chuan an tarlang.
Kum 26 mi Andre Silva pawh hi professional footballer a ni a, Portuguese second division Penalfiel tana khel mek a ni.
Thla hmasa ni 22 mai khan Jota hian hun rei tak a lo kawppui tawh Rute Cardoso chu nupuiah a nei a, fa 3 an nei hman a ni.
Diogo Jota hi lung lama harsatna a tawh avangin zai a tawk a, doctor te chuan thlawhnaa chuang lo turin thurawn an pe.
Hei vang hian Jota hian lawng hmanga UK pan a tum a, a unaupa Andre Silva nen chuan Lamborghini car hmangin an kal a, Spain hmar lama lawng chawlh hmun Santander an pan.
Zamora kianga Cernadilla kawnga an tlan mek lai chuan an hmaa motor tlanpelh an tum. Hetah hian an car ke a puak a, an chesual zui ta. Car hi a insawh na hle a, a kang chhunzawm bawk a, an nunna an chan ta a ni.
Kum 2020 khan Diogo Jota chuan Liverpool a zawm a, Anfield-ah player lawm hlawh ber pakhat a ni.
Liverpool tan game 182 a khel a, goal 65 khungin, assist vawi 22 a nei.
Season liamta khan Liverpool chu Premier League no mawi a chawipui a, Portugal pawh Nations League no mawi a chawipui bawk.
Hlawhtlinna ropui tak a chang a, chawlh a hman laiin a hmangaih em em Rute Cardoso chu kar hmasa Pathianni khan nupuiah a nei. Hun hlimawm tak a hman mek laiin a boral ta a ni.
"Portuuese Football Federation (FPF) leh Portuguese Football chu min barakhaih a, a pawi kan tiin kan tuar tak zet a ni.
"Jota hi player danglam bik a ni a, ram tan game 50 a khel. Diogo Jota hi player ropui tak, a khelhpui leh khingpui te pawhin an zah thin a ni a, mi dang tihlimtu a ni.
"Player ropui pahnih kan chan, Diogo leh Andre Silva te aiawh zo hi an awm dawn lo. An hnuhma ropui tak hi kan sawi zel dawn a ni," tiin Portuguese Football Federation (FPF) chuan thuchhuah an siam.