Thawhlehni zan khan Group D inkhelhah France team-in 4-1 in Australia an hneh. France tana goal khung hnem ber record khum thei mai tur Oliver Giroud a thlak avangin Didier Deschamps chuan dem a hlawh hle. 

Australia an hmachhawn tum hian Oliver Giroud chuan goal 2 khungin, France tana Thierry Henry-a goal record 51 chu a tluk a. Nimahsela, hun tawp lamah he striker hi Marcus Thuram chuan rawn thlakin, record khum tur hian inrinnia Denmark an hmachhawn hun a nghah mai a ngai ta a ni. Kum 36 mi Giroud hi France tana World Cup goal khung thei upa ber dawttu a ni bawk.

Reporter pakhatin Giroud a thlak chhan a zawh chuan Deschamps chuan," Ka aiawh hian France team enkawl hna hi rawn thawk ve chhin la," tiin a zawttu chu a chhang let.

"Oliver Giroud hian theihtawp a chhuah a, goal pawh a khung. Mahse coach kan nih angin kan rem fel a ngaih chang a awm thin. Ni 4 hnu maiah match kan nei leh dawn a, goal 4 kan khung der tawh bawk. 

"A chang chuan midang tan hun tha siamsak a tul thin, tichuan ani pawh a chawl hahdam thei ang. Giroud hi a tangkai em em a, attacker-te nena an inzawmna pawh a tha," tiin inkhelh zawhah Deschamps chuan a sawi.

Craig Goodwin-a'n hma taka goal hmahruai a khung vang khan France hi World Cup bul tan tha vak lo tura ngaih an ni hman a, mahse rei loteah Giroud hian thil a rawn thlak danglam ta a ni.

A tira goal an chhuah mai dan zawhna chu Deschamps chuan," Bul kan tan tha reng, mahse kan ven ngei ngei tur goal kan chhuah palh a ni. A harsa ve a, mahse second half-ah kha chuan kan theihna lantirin goal pawh kan khung nual.

"A aia tam pawh khung thei kan ni. Bul tanna tha tak a ni. Match hmasa ber hi a pawimawh em em a, team-te pawh ka lawmpui," tiin a sawi bawk.