Bayern Munich midfielder Jamal Musiala chuan a inhliam dan chungchangah, "Dem tur tumah an awm lo," tiin a sawi.

Kar hmasa khan Club World Cup quarter final-ah Bayern Munich leh PSG an inhmachhawn a, PSG goalkeeper Gianluigi Donnarumma chuan Musiala ngal ruh te zawk a bawhtliak. 

Musiala hi thawhtanni khan hlawhtling taka zai a ni a, a lo berah thla 4 tal a chawlh a ngai dawn. Social media-ah kum 22 mi Musiala chuan a hliam chu hlawhtling taka zai a nih thu a sawi rualin, a inhliam danah dem tur tumah an awm loh thu a sawi.

"Min hmangaih a, min ngaihtuahtu zawng zawng chungah lawmthu ka sawi e. In mi ngaihtuahna hi ka tan chuan a hlu lutuk a nia.

"Hetiang harsatna kan han tawh chang hian, football fan ten duhsakna min hlan mawlh mawlh a, hei hi a hlu a ni. Hlawhtling takin min zai a, tha taka enkawl ka ni e.

"Ka sawi duh pakhat chu, ka inhliam dan chungchangah hian dem tur tumah an awm lo a nia. Hetiang hi chu a thleng ve thei reng a ni. 

"He ka chawlh hun hi tangkai taka hman ka tum dawn a, tha tak leh chak zawka lo kir leh ka tum dawn a ni. Kan inhmu leh thuai dawn nia," tiin Musiala chuan Social media lamah video thuchah a sawi.