Chelsea striker Liam Delap chu December thlaah chauh a rawn kir thei dawn niin Enzo Maresca chuan a sawi.

August ni 30-a si hnih faia Fulham an hneh ṭum khan Delap hian kaihza hliam a nei a, Tyrique George chuan a thlak. Maresca chuan kar 10 atanga kar 12 vel chhung a chawlh a ngaih tur thu a sawi a ni.

Kum 22 mi hi November thla vela lo kir leh thei tura beisei ni mah se, a hliam dan en chian a nih hnuah kar 12 thleng pawh a chawlh a ngaih tur thu coach-in a sawi.

Chelsea chuan Delap a inhliam avang hian England Under 21 international Marc Guiu chu an ko kir a, ani hi tun season chhung atana Sunderland pan tura tih ni mah se, Stamford Bridge lamah a kir leh ta zawk a ni.

Delap hian Champions League match tir lam a hmaih nual dawn a, Bayern Munich pawh a hmachhawn thei dawn lo a ni. Premier League fixture pawimawhah Liverpool leh Tottenham a hmachhawn thei dawn lo bawk.

Tun nipui bazar inhawn lai khan Chelsea chuan Ipswich Town aṭangin Delap hi £30million-in an lei a, Club World Cup-ah game 6 a khel a, goal 1 a khung ve. Premier League match hmasa pathumah vawi hnih inkhelh bul a ṭan bawk.

"Delap hi thla 10 atanga 12 vel a chawlh a ngai dawn, tuna number 9 position-a kan neih chhun chu Marc Guiu chiah a ni, Joao Pedro pawh hi kan chhawr thei ang chu. Fulham kan hmachhawn khan George pawh kan chhawr a nih kha," tiin Maresca chuan a sawi.

Cole Palmer pawh a lo kir leh dawn hnai tawh a, inrinnia Brentford an hmachhawn huna inlan ve ngei tumin hma a la mek. England forward hian West Ham leh Fulham te kha a hmachhawn thei lo a ni.

"Nimin lamah Cole chuan training a rawn zawm ve a, hun pum chuan min rawn hmanpui lo. Chawhnu lamah kan bei nasa deuh a, naktukah hian a inlan thei dawn nge dawn lo ka la sawi lawk thei lo.

"A hliam a dam chho a, a dam chian hunah pawh a inkhelh hun chhung tur kan bituk a ngai a ni. A chhan chu a dam hi chuan kan khelhtir ngar ngar a, kan dim deuh a ngai dawn a ni," tiin Maresca chuan a sawi bawk.