Juventus defender Matthijs de Ligt chuan Juventus nen contract thar chungchangah an indawr mek thu sawi mah se, contract thar a ziak dawn nge a chhuak dawn tih chungchangah a rilru a la siam fel loh thu a sawi tel.

De Ligt hian kum 2019 khan Ajax atangin Juventus hi a pan a, Juventus-a a season hmasa berah Serie A title chawi mah se, hemi hnu hian a zawnin Serie A-ah Juventus hi palina an ni.

Juventus a zawm hnuah beisei angin De Ligt hi a season hmasa pahnihah a khel tam lova, mahse season khelh zawh takah khan competition hrang hrangah vawi 42 inlanin, Juventus a zawm hnu a la khelh that ber season tih theih a ni.

De Ligt hian transfer window-ah thawm a nei fo a, nikum pawh khan Juventus atang hian chhuak tur anga sawi a ni a, kuminah pawh a chhuak dawn anga sawi a ni.

Kum 22 mi hian Juventus-ah hian season hnih dang contract a la nei a, Juventus hian an defender hi contract thar ziahpui tumin hma an la mek.

“Inbiakna a kal mek a, a hun a thlen hunah contract thar ka ziak dawn nge hmun dang ka pan dawn tih ka thlang ang. Ka tana sporting project tha ber hi ka ngai pawimawh ber a, a zawnin palina kan ni a, a tha tawk lo hle a ni,” tiin Dutch defender De Ligt chuan a sawi.