Dutch top flight league-a Ajax leh Feyenoord te inkhel chu, fans in an tihbuai avangin game laklawha tihtawp a ni a, tun kar Nilainiah De Klassieker hi an khel chhunzawm dawn tih Netherlands-a football thuneitu sang ber KNVB chuan an puang.

Sunday liamta khan Dutch top flight league inkhelah Dutch team lian pahnih Ajax leh Feyenoord te an inkhela, mahse he inkhel hi 56mins-a tihtawp a ni. Nilaini hian entu mipui awm lovin he inkhel hi khelh zawh a ni dawn a, 56mins atangin an inkhel tan dawn a ni.

Ajax leh Feyenoord inkhel hi De Klassieker tia sawi thin a ni a, Ajax hian Eredivisie champion lai Feyenoord chu Johan Cruyff Arena-ah lo mikhualin, home fans lamin khelmual chhunga halpuah leh flare an vawm luh nasat avangin an inkhel chhunzawm thei lo.

First half-ah mikhual lam Feyenoord chuan si thum faiin hma an hruai a, first half-ah hian halpuah leh flare te hi khelmual chhungah fans in an vawm lut tan tawh. Darkar khat an khelh tlin hma deuhin inkhel tihtawp lailawk a ngai ta hial a, buaina a zual zel avangin inkhel an suspend ta a ni.

Ajax hian Nilaini hian FC Volendam hmachhawn tur an ni a, mahse Feyenoord nena an game chhunzawm tur a nih avangin Volendam nena an game hi KNVB chuan an sawn hlat sak.

Game dang a awm laia KNVB in Nilainia an game an khelh chhunzawm tir tur hi Ajax lam hian an pawm lo hle a, club hnih bakah an supporter te tan KNVB chuan thil an khirhkhan zo niin an sawi a, Volendam pawh hian an game sawn hlat sak a ni chu an lawm loh thu leh, an dikna chanvo neihte an zir chian tur thu an puang ve bawk a ni.