Manchester United chuan an goalkeeper David De Gea chu hun rei zawka tan an thlung nghet dawn.
De Gea hian Manchester United ho kum 2011 khan Atletico Madrid atangin pound maktaduai 18.9 sengin an laluta, an player pawimawh tak ni chhovin, Manchester United Player of the Year vawili lai a ni tawh.
Kum 27 mi hian kum 2019 thleng a cotract-ah a la nei a, United hian an duh chuan season khat ziahpui theihna an nei bawk.
Kum 2015 khan De Gea hi Real Madrid chuan lak an tum hle a, lehkha pawimawh tihfel a nih hman loh avang chauhin De Gea hi a chhuak lo.
De Gea dinhmun hian a khat tawkin thawm a nei reng a, tunah erawh Real Madrid chuan Chelsea atangin goalkeeper Thibaut Courtois an lalut tawha, hei hi United tan vanneihna a nih ngei a rinawma, Spain international De Gea hian Old Trafford-ah contract thar a ziah ngei a rinawm ta hle.
De Gea hian Iker Casillas luahlanin Spain first-choice a ni chhova, kumin World Cup-ah erawh a che ropui lem lova, save vawi khat chiah neiin, Portugal laka a tihsual avangin Cristiano Ronaldo chuan goal a khung phah nghe nghe.
Season liamta khan United chu Premier League-ah pahnihna nih puiin a khel tha hle a, Premier League Golden Glove award a dawng a ni.