De Bruyne-a'n MOTM phu a inti lo

24th November 2022, 01:11PM

World Cup Group F match hmasa berah Belgium-in 1-0 in Canada an hneh. John Herdman-a pawlte chu a nawrtu zawk ni mah se a tawpah a tlawm zawkah an tang ta tho.

Thibaut Courtois chuan Alphonso Davies-a penalty pet chu tha taka save-in rei loteah  Michy Batshuayi chuan Belgium chakna goal a khung.

Kevin De Bruyne chu he inkhelah hian man of the match-a thlan a ni a, thlan a nih chhan hi amah pawhin a hrechiang bik lo.

Inkhelh zawh press conference-ah De Bruyne chuan," Ka khel tha paw'n ka hre lo, trophy ka dawn ngawt chhan hi ka hre lo a ni, ka hming vang pawh hi a ni maithei. 

"A team ang pawh khan kan khel tha ka ti lo. A bik takin first half-ah ngat phei kha chuan bul kan tan chhe lutuk a, Canada lam kha kan hneh lo lutuk. Mahse hnehna kan chang ta tho a," tiin a sawi.

De Bruyne hian a ball pass 33-ah 23 chiah pass dik a nei, mahse chance vawi 4 siamin a team-mate dangte ai chuan chance a siam hnem zawk tho.

Toby Alderweireld nena an inchhuahchhalhna chungchang zawhna chu," Kan khelh dan ka'n en khan ball kan vawrh nasa mah mahin ka hria, kar awl kha a zau mah mah. Nawr ve kha kan tum tur a ni a, kan dawihzep mah mahin ka hria. Half time-ah Toby nen kan inkar kha chu kan sawifel a, kan tha e," tiin De Bruyne chuan a chhang.

Belgium head coach Roberto Martinez pawhin a team-te chu khel tha a ti bik lo, mahse point 3 an hmuh avangin a lawm. An chakna hi vanneih thil vang mai mai a nih loh thu leh an theihna tak tak an la chhuah loh thu a sawi.

Tournament lian tham a an team khelh chhiat ber tum a ni em? tih zawhna chu," A chhe ber kan teh dana zir a ni ang chu. Technical tak chuan a chhe khawp mai, mahse game chhe ber erawh a ni lo, chakna game a ni miau a.

"Khel tha lo chunga chak hi tihpalh thil thua thleng a ni lo a, kan khelh dan dang kan hmuhtir a ngai, kan defence tha ka ti. Buaina neuh neuh kan hmuh kha chu player-te an thutak vang a ni," tiin Roberto Martinez chuan a chhang.

"Canada khelhdan kha kan zah a, an nawr nat zia pawh kan hmu vek. Mahse kha vang khan chak kan phu lo tihna a ni lo. An game duh ang kan pe a, engti zawng paw'n Canada hi an tha zawk. Mahse chak chu kan phu ve thoin ka hria," tiin Martinez chuan a sawi bawk.

Canada an khel tha a, chance pawh an nei hnem khawp mai. Mahse goal erawh an khung thei ta lo a. Group F-ah Belgium chu point 3 nen group hmahruaitu an ni mek a, Croatia leh Morocco te an lo inhnehtawk bawk a, Canada erawh a mawngah an awm mek.

 

 

Copyright © inkhel.com 2022. All rights reserved.