Argentina coach Lionel Scaloni chuan Brazil rama Copa America khelh turah Argentina ram aiawha feh chhuak tur mi 28 a puang chiang ta a, an ram squad ho hi bih chiang ila.
Lionel Scaloni player thlan chhuahte hi Lionel Messi chuan a ho dawn a, Sergio Aguero leh Lautaro Martinez te pawh koh tel an ni bawk a. Koh tel loh langsar zual zingah chuan Sevilla winger Lucas Ocampos leh Tottenham Hotspur defender Juan Foyth te an tel a ni.
2019-20 season chhung khan Lucas Ocampos chu Sevilla ah a che fuh angreng hle a, 2020-21 season-ah erawh beisei a pha ta chiah lo a, Spanish club tan hian game 46 khelin hengah hian goal 8 chauh a thun thei a. 2019 atang khan Argentina aiawhin vawi 8 chu a feh chhuak tawh a, heti taka ram aiawh tura koh chhuah hlawh a nih rual hian tun hnaia a chet that vak lo avangin Copa America khel tur hian koh tel a ni ta lo a. Chutiang deuh bawkin beisei anga khelmuala a chet that bik loh avangin Juan Foyth pawh koh zingah a tel thei ta bik lo a ni.
Argentina tana vawi 120 zet mai feh chhuak tawh Paris Saint-Germain star Angel Di Maria chu tun tumah hian an ram aiawha inkhel zinga langsar pawl tak a nih a rinawm a. Tun hnaia Manchester City chhuahsan a Barcelona zawmtu, striker senior Sergio Aguero pawh a che chhe vak lo turah a ngaih theih bawk.
Inter Milan player Lautaro Martinez chuan Serie A lamah season a hmang tha angreng bawk a, mahni inrintawkna a neih that viau a rinawm a, chet pawh a che tha thawkhat ngei ang. Lucas Alario chuan 2020-21 season chhungin Bayer Leverkusen tan goal 15 a thun thei a, ram tan pawh chhawr tlak pawl tak ni turah a ngaih theih ang a. Lionel Scaloni tan Lazio forward Joaquin Correa pawh rintlak viau tura ngaih a ni.
Lionel Messi chuan Barcelona tan a thawh hlawk leh viau mai a, tun season hman zawh takah khan inelna hrang hrangah goal 38 lai a thun thei a. Messi hian La Liga bikah goal 30 thunin goal thun hnem ber a ni a, Pichichi chawimawina a dawng thei a, mi goal thun tur vawi 9 chu a siamsak bawk a. Argentina aiawha a feh chhuah tawhnaah Messi hian goal 72 chu a thun tawh a, an ram aiawh hian game 97 a khel tawh a, tun tum tournament-ah hian vawi 100 chu a khel tling hman ngei tura ngaih a ni a. Messi hian an ram hi trophy a la lakpui lo a, kuminah hian lakpui ngei a tum viau ang.
Cristian Romero, Atalanta te, Lucas Martinez Quarta, Fiorentina te leh Nicolas Tagliafic, Ajax te chu tlar hnung lama rinawl tur te an ni dawn a, anni zarah hian goal pawh an chhuah tlem theih ngei an beisei a. Aston Villa goalkeeper Emiliano Martinez chu goal vengtu tur a ni dawn a, eng ang taka rintlak nge a nih tih chu kan hmu fo tawh a ni.
Mual laihawlah Leandro Paredes, Rodrigo De Paul, Giovani Lo Celso leh Angel Correa te ho an awm dawn a, an khingpui team te tan chuan an tawrhhlelhawm hlawm viau tura ngaih a ni.
Argentina squad:
Goalkeepers: Franco Armani, Emiliano Martinez, Juan Musso, Agustin Marchesin
Defenders: Gonzalo Montiel, Nicolas Otamendi, German Pezzella, Nicolas Tagliafico, Lucas Martinez Quarta, Marcos Acuna, Lisandro Martinez, Nahuel Molina Lucero, Cristian Romero
Midfielders: Leandro Paredes, Giovani Lo Celso, Exequiel Palacios, Nicolas Gonzalez, Guido Rodriguez, Rodrigo De Paul, Alejandro Gomez, Angel Correa, Nicolas Dominguez
Forwards: Messi, Lautaro Martinez, Angel Di Maria, Joaquin Correa, Sergio Aguero, Lucas Alario