Harry Kane chuan runa a khelh mekna Tottenham Hotspur tana contract thar ziah belh turin a inpeih a, inbiakna pawh an kalpui mek niin Sky in Italy chuan a tarlang.

Spurs ah hian Kane hian a contract tawpna kum a hmang mek a, tun season tawpah hian a contract a zawh tawh dawn avangin Manchester United nen sawi zawm a ni mek.

Mahse, chanchinbu mite tarlan danin Tottenham leh Kane-a agent te hian hun rei zawk cham tura contract ziah belh turin inbiak an kalpui mek a ni.

Sky in Italy reporter Gianluca Di Marzio chuan The Transfer Show hnenah heti hian a sawi, "Spurs leh Harry Kane-a agent te hian inbiakna an kalpui mek a.

"Contract thar ziah belh turin Kane hi a inpeih tawh avangin inbiakna hi an nei nghal a ni," tiin a sawi.

North London club te erawh hi chuan an inbiakna neih chungchang hi an pha nasa hle thung.

Kum 29 a upa Kane hian Spurs tan a khel tha thin hle a. Thawhtanni zana Fulham 1-0 a an hneh tumah pawh khan goal awmchhun hi khungin, Spurs tana goal khung hnem ber Jimmy Greaves-a goal thun zat a nihrual a, goal 266 a thun tawh.

Hetiang hi ni mah se England captain hian Spurs tan nomawi a la chawi loa, Spurs pawh hian kum 2008-a League Cup an chawi bak kha an la chawi leh miah lo. Tun season-ah hian Antonio Conte team te hi Premier League ah panga-na an ni mek a, Champions League ah round of 16 lut tawh, FA Cup fourth round an lut tawh bawk a ni.