Tottenham boss Antonio Conte chuan season tawp hmain an ban a beisei lo tih a sawi.

London hmar veng club hian kar hmasa khan Champions League an mangtha a, Conte hian a beisei aia hmain an ban daih thei tih a sawi. Tun season tawp rual hian a contract neihlai a zo dawn a, Italy-ah a kir dawn niin thuthang a awm.

Milan an hnehloh hnua a thusawi hi fiamthu mai mai anih thu Ningani khan a sawi a, thutaka lak tur engmah a awm lo tih thuthar lakhawmtute a hrilh.

Kum 53 mi chuan, "Ka hmalam hun ka sawi kha fiamthu mai a ni a, thutaka lak tur a awm lem lo. Ka chungchang min zawh avangin ka chhang che u a, engnge thleng mek in hriatloh thu min hrilh bawk. Ka sawi fo tawh angin min ban mai chu ka ring bik lova, nitin kan hnathawh leh chetdan an hmu.

"Club zawng zawng hian manager-te hnenah an ban hun tur an sawi ngai lova, mahse beisei loh leh chanloh khanah thil a thleng ve thin. Naktuka thleng tur tumahin kan hre lova sawilawk thei pawh an awm lo. Kan hotute hian kan hnathawh danah sawisel an nei ngai lova, kan thlen chinah an lungawi niin ka hria."tiin a sawi.

Champions League atanga an tlak hnu lawkah hian FA Cup an thlahliam zui a, Championship club Sheffield United chuan an hnawtchhuak. League lamah pangana niin Top Four an beisei mek a. Conte hian chhuak tur anga an sawi mek Harry Kane chungchang pawh a sawilang a, England forward hi Tottenham-a awm char char turin a duhsak a ni.