Zlatan Ibrahimovic chuan Pathiannia Khabib Nurmagomedov leh Conor McGregor te inbeih hunah Conor chu tan zawk mahse Khabib chu a chak a rin thu a sawi.

Swedish legend Zlatan Ibrahimovic hian a hmain Irish fighter Conor McGregor chu ‘Zlatan Ibrahimovic of boxing’ tiin a lo sawi tawh a, Floyd Mayweather nen an inhnek dawn khan hemi hi sawiin, McGregor hian khawvel hmun hrang hranga awmte barakhaihin Floyd Mayweather chu a hneh dawn niin a lo sawi tawh a ni.

Ibrahimovic hrilhlawkna hi a thleng dik ta lo a, nikuma an inhnek khan round 10-naah Floyd Mayweather chuan The Notorious chu a hneh a. A hmaa a lo hrilhlawk dik tawh loh hnuah Zlatan chu a ngawi duh mai bik lo a, kar tawpa Conor leh Khabib inbei turah Khabib Nurmagomedov chu chak zawk tura a rin thu a sawi leh a ni.

The Mirror in an kawmnaah Zlatan Ibrahimovic chuan, “Khabib hi a chak ngei ka ring a, a chhan chu he fighter hian a man beh tawh chu a thlah mai mai tawh tlat lo a ni,” a ti.

“Octagon chhungah a khingpuite chu hrehawm tinreng a tawrhtir phwt thin a. Hei mai hi a la ni lo a, hrehawm nasa tak a tawrhtir hnuah an tlawm hun a nghak chhuak kher thin a. Chutiang chiah chuan Conor pawh hi Khabib hian a tih ka ring a ni,” tiin a sawi.

Major League Soccer club LA Galaxy a khel mek Ibrahimovic chuan, “Khabib hi a tawng tlem zawk a, Conor te ang pung pung a ni lo a. Ngawichawi deuh hian a hlauhawm phian bawk si a, ‘silent assassin’ a ni ber mai,” a ti.