Belgian footballer Radja Nainggolan chu cocaine trafficking chungchangah man a ni tih BBC chuan a tarlang.

Belgian police te chuan an ram chhunga Cocaine lak luh chungchang leh sem darh chungchangah beihpui  thlak a, mi ṭhahnem tak manin, hetah hian kum 36 mi Radja Nainggolan hi a tel ve a ni.

South America aṭanga Europe-a cocaine lak luh chungchang te, Antwerp lawng chawlhhmun aṭanga Belgium ram chhunga sem darh chungchang te ngun takin Belgian Police te chuan an chhui a, thawhṭanni khan Radja hi man zingah a tel nia tarlan a ni a, a bak chu a chungchang kimchang tarlan a ni rih lo.

Radja hian Belgian second division Lokeren a zawm thar a, a debut game-ah goal khungin, 1-1 in K. Lierse nen an inhnehtawk. A club thar a zawm aṭanga ni 6-na chauhah man a ni ta a ni.

Radja hi Antwerp-a piang a ni a, a football hun tam zawk chu Italy-ah hmangin, Roma leh Inter Milan tan a khel ṭhin. Kum 2009 aṭanga 2018 inkar khan Belgium ram tan vawi 30 a inlan bawk.