FIFA Club World Cup tihlen chu nakkum nipui laiin khelh a ni dawn. Hetah hian FIFA chuan khawmualpui hrang hranga club ṭha te khel turin ruahmanna a siam. Club 32 te an inel dawn a, hetah hian Inter Miami an lang ve nawlh mai.

Club World Cup hrim hrim hian sawisel a hlawh sa a, team 32 lai inelna a ni dawn a, season tluanin domestic league leh cup bakah, khawmualpui inelna an hmachhawn hnuin, an chawlh hahdam ve theih lai takin hetiang inelna lo buatsaih hi player leh club ten an duh lo hle. Mahse ruahman angin FIFA chuan kalpui a tum ta tho tho.

Mi tam takin, "Engtin nge Inter Miami hi an tel ve nawlh?" Tih chu an zawhna a ni. Lionel Messi chuan Club World Cup a khel ve dawn tihna a ni a, hetih lai hian an qualify dan hian sawi erawh a hlawh hle.

Club 32 zingah club 30 te tihchian nghal an ni a, hmunruak pahnih la awm chu a thlengtu ram team pahnih tan dah a ni. He hmunruak pahnih hi US aṭanga Major League Soccer Champions emaw MLS Cup winner emaw telna tur nia ngaih a ni. 

Tin, heti hi a ni a, kar hmasa khan FIFA President Gianni Infantino chu US-ah a kal a, Club World Cup-ah Inter Miami an tel tur thu a puang chiang nghal rup mai. 

Ngaihdan chi hrang hrang a piang nghal a, Lionel Messi chu footballer ropui a ni a, Club World Cup-a a inlan hian entu an tam ang a, FIFA pawhin sum tam tak an lak luh theih a rinawm. Heng te avang hian FIFA chuan Inter Miami an duhsak niin an ngai.

Inter Miami hi MLS regular-ah hmahruaitu an ni a, point hlawhchhuak hnem ber niin point 74 an hlawhchhuak. Chung te avang chuan FIFA chuan Inter Miami chu an MLS atanga Club World Cup khelh phu ber niin an ngai niin a lang.

Playoffs khelh a la ni ang a, Inter Miami pawh an champion thei ang a. Tin, anni kher lo pawh midang an champion thei bawk ang. MLS Cup-ah tu nge champion dawn tih pawh sawi theih a la ni lo a, eng pawh nise, an champion emaw champion lo emaw, Inter Miami chu Club World Cup-ah an inlan dawn hrim hrim tih a chiang tawh a ni.